Mawkyrwat, Lber 18 : Kum shibynta jong ka jingpynshlur na ka bynta ki samla kynthei ha ka liang ka kam ïalehkai sports, ka ophis jong u District Sports Officers (DSO) ka South West Khasi Hills District ha sngi saitjaiñ jong ka taïew ka 15 tarik u Lber, 2025 ka la ïoh ban pynlong ïa ka ASMITA Archery City League 2025 kaba dei da ka jingïakop-siat khnam ha Khelo Centre kaba don ha Maharam Government Higher Secondary School, Mawkyrwat, South West Khasi Hills District.
Ha kane ka jingïakop-siat khnam kaba dei ha ka jingjngai kaba 30 meters ïa ka nam lah duh la rah da ka samla Ilarisuk Wanniang, ba ar ka samla Aifida Kharsohphoh bad ba lai ka samla Emisha Kharsohphoh. Nangta, na ka bynta ki nongjop ne ki lahduh na baroh ki ba wan ïa shimbynta ne lah ban ong Overall Champion la ïoh ba nyngkong da ka samla Aifida Kharsohphoh, ba wan ba ar ka samla Ilarisuk Wanniang bad ba wan ba lai dei ka samla Emisha Kharsohphoh.
Ha ka jingïalang ba lyngkot, u bah Damang Syngkon, District Sports Officer (DSO) jong ka South West Khasi Hills District u la pynpaw ka jingsngewkmen ba ki la ïoh ban pynlong ïa ka kane ka ASMITA Women League 2025 kaba long ruh kawei na ki bynta ban ai lad bad ai mynsiem ïa ki khynnah bad ki samla kynthei ba kin ïoh lad ban mih shakhmat da kaba pynpaw ïa la ki jong ki sap ki phong ha ki kam ïalehkai kiba pher bapher.
U la ong ruh ba kane ka jingïalehkai ka long ruh kum shibynta jong ka jingrakhe ïa ka International Women’s Week, kaba long ka dak pynshlur ïa ki samla kynthei ba kin mih shakhmat ban ïashimbynta ha ki kam ïalehkai la ka long ha kano kano ka jait jingïalehkai. Namarkata, u la on shuh shuh ba lyngba kane ka prokram ïakop siat khnam kiwei ki samla kynthei lyngba kane ka lympung ïalehkai kin mih shakhmat namar lyngba ki jingïalehkai ka ai shibun ki jingmyntoi khamtam eh ban ïoh ka jingkoit jingkhiah ha ka met ka phat bad kumjuh ruh haba phai ha kine ki sngi ka kam ïalehkai sports ka la dei kawei na ki lad ki kabu ban pynïoh-kam ïoh-jam bad kan plie ruh ki lad ki lynti ïa shibun na ka bynta ka lawei bha bha jong ki khun samla.
Ha ka jingkren jong ka R. Ch. Marak napoh jong ka Mawkyrwat Women Police Station ka la ai mynsiem na ka bynta ki samla kynthei kiba la wan ïashimbynta ha kane ka jingïakop ba ki dei ban don ïa kata ka thong ryngkat ka jingpynleit jingmut haei ki dei ban kynjoh. Namarkata, ka la buh ka jingkyrpad ïa ki samla ba kim dei ban don ka mynsiem ban kiew tang ïa lade ha ki kam ïalehkai hynrei ki dei ruh ban wer lem ïa kiwei khnang ba kito kiba don shisha ïa ka sap kin ïoh ka lad ban pyni ne pynpaw sha ka pyrthei.
Kiwei de kiba la ïa donlang ki long naduh ki nonghikai kiba la shah khot sngewbha, ki 18 ngut ki ‘thei ïalehkai bad ym tang kata hadien ka jingïakop la ïoh ruh ban sam ïa ki khusnam sha ki nongjop ha ka jingïakop-siat khnam na ka bynta kiba 40 meters ïa ka kyrdan ba nyngkong la ïoh da ka samla Aifida Kharsohphoh, ba ar ka samla Ilarisuk Wanniang bad ba lai da ka samla Merisha Marthong.
