U Sunil Chhetri un mih madan beit pyrshah ïa ka Maldives, ong u Coach ka India

Shillong, Lber 18 : Ka jingkhmih lynti jong ki paidbah ka Meghalaya ban ïohi markhmat ïa u khlur ïalehkai ba kynsai tam ka ri , u Sunil Chhetri ha ka jersey jong ka ri India ban ïalehkai ha madan JN Stadium Polo, Shillong, kan urlong ha kane ka janmiet sngi Balang.
Lah ban shu pynkynmaw, ba ka kynhun ïalehkai ka India ka don mynta ha nongbah Shillong ban ïalehkai paralok pyrshah ïa ka Maldives ban pynkhreh naka bynta ka jingïakhun knieh rung sha ka AFC Asian Cup 2027 kaban long ha ka 25tarik mynta u bnai pyrshah ïa ka Bangladesh ha Shillong hi.
Haba kren bad ki lad pathai khubor shisngi shwa ka jingïakhun, na ka liang u coach ka kynhun ïalehkai ka India, u Manolo Marquez uba la pyntip ba u Chhetri un mih madan beit ha kane ka janmiet kam pher la u mih naduh kaba sdang lane kham hadien jong ka jingïalehkai ruh.
“Un mih madan beit tangba ym lah ban tip un mih naduh ba sdang lane hadien namar ki don haduh 17 ngut ki rangïalehkai bad 6 ngut ki rangïalehkai ban shongben,” ong u Coach.
Ha kajuh ka por u la Coach u la pyntip ruh ba uwei na ki rangïalehkai shakhmat ka kynhun u Chhangte un ym lah ban donlang bad ka kynhun namar ka jingmynsaw.
Da kaba pynpaw ruh ïa ka jingkmen ba ki la ïoh ban wan ïalehkai ha ka sien kaba nyngkong ha nongbah Shillong, u Coach u la ong ba hadien ba u ïohi ïa ka jingïalehkai kaba shongshit bha ha ka Durand Cup ha nongbah Shillong u la don ka jingkyrmen ba ha kawei ka sngi ki kynhun ïalehkai jong ka Ri kin sa lah ban wan ïalehkai ha kane ka jylla.
U Manolo u la bynrap ruh da kaba ong ba kum ka kynhun kin ïakhun tyngeh ban khur ïa ka jingjop ha kane ka jingïalehkai paralok.
Ha kajuh ka por pat haba jubab halor ka jingkylli, u Coach u la ong ruh ba ka thup ïalehkai jong ka Ri kaban ïakhun pyrshah ïa ka Maldives kan ym da ïapher than naka kynhun kaba dang shu dep ïakhun shen.
Katba na ka liang u rangap dien ka India, u Mehtab Singh u la ong ba kynhun ka la pynkhreh bad ki khmih lynti ba kin lah ruh ban ïalehkai bha ha ki ar tylli ki jingïakhun kiban long ha nongbah Shillong.
Une u rangïalehkai u la pynpaw ïa ka jingkmen ban ïoh wan ïalehkai ha Shillong bad kumta u ong ba u khmih lynti ba ki samla ba ieid phutbol ka jylla kin shim ïa kane ka kabu ban ai mynsiem ïa ki ha ka lynti ïaid jong ki kum ki nongïalehkai.
“Ngi sngewtynnad ba ngi ïoh ban wan ïalehkai ha Shillong, kadei ka sien kaba nyngkong ïangi ban wan ïalehkai hangne watla ngi tip ba kane ka thain shatei lam-mihngi jong ka ri kadei kaba ieid phutbol bha,” ong utei u rangap dien ka kynhun ialehkai ka ri.
Na ka liang u coach ka Maldives pat, u Ali Suzain u la ong ba kane ka jingïakhun pyrshah ïa ka India ka long kum ka jingpynkhreh na ka bynta ka jingïakhun ïa ka Phillipines kaban long pat ha ka 25tarik mynta u bnai.
Haba kren halor ka kynhun ïalehkai ka India, une u coach u la ong ba baroh ar tylli ki kynhun ki long kiba khlain bad kumta ka jingïalehkai kan long kaba mar ïa biang bor bha.
Da kaba pynpaw ïa ka jingsngewnguh halor ka rukom pynkhreh ha Shillong, une u coach u la ong ba ka jingïakhun pyrshah ïa ka India ka long kaba kongsan bha khamtam naba ka long kum ka jingkilan met ban pynkhreh pat na bynta ka jingaireng ïa ka Phillipines ha ka 25tarik.
“Kadei ka jingïakhun kaba donkam bha namar ka India bad ka Maldives ruh ki dei ki kynhun kiba khlainbor bha. Kumta nga khmih lynti ba kan long ka jingïalehkai kaba itynnad bha,” u la ong.
Da kaba kubur ba kum ka kynhun watla kim shym la ïoh than ban ïalehkai kham bun tylli ki jingïakhun bar ri hynrei u tip khambha ïa ki rangïalehkai ka kynhun namar ha ki katta snem ba u don bad ki u la tip lut ïaka jingkhlain bad ka jingtlot jong ki.
“Ki rangïalehkai ruh ki shaniah hapoh ka jingïalam jongnga,” u la bynrap biang.
U coach ka Maldives u la ïathuh ruh ba ha katei ka ri baroh ki ieid ïa ka phutbol bad man ki jaka ki don ïa ki madan ïalehkai phutbol.