New Delhi, Naiwieng 03: U Myntri Sorkar Pdeng ba dei peit ïa ka Tnad Communications bad Development of North Eastern Region u Jyotiraditya Scindia u la plie paidbah mynta ka sngi ïa ka North Eastern Science & Technology (NEST) Cluster ha IIT Guwahati bad u la buh maw nongrim na ka bynta ki projek kam pynroi ba shongdor haduh T.635 klur ha baroh kawei ka jylla Assam.
Ha kane ka sngi la wan ban ïashim bynta da ki heh ophisar jong ka sorkar Assam, ki nongmihkhmat jong ki jaka pule, bad ki dkhot jong ki stad saïan bad kynhun seng kam.
Haba ai jingkren ha kane ka sngi, u Scindia u la ong ba ka Assam ka dei “ka dohnud jong ka thaiñ shatei lammihngi kaba dang kiew shaphrang, ha kaba ka Brahmaputra kaba khraw ka tuid kum ka dak jong ka jingïaibteng, ka jingshlur, bad ka jingsaiñdur.” U la ong ba ka Assam, kaba la long ka khyrdop sha ka phang mihngi jong ka India, mynta ka paw kum ka jaka saiñdur thymmai bad jingpynïasoh jong ka Viksit Purvottar.
U Mawnongrim na ka bynta ki projek kam pynroi ba T.635 klur ha Assam
U Myntri u la buh maw nongrim na ka bynta ki projek kiba kot haduh T.635 klur, kiba thmu ban kyntiew ïa ka roi ka par, ka jingpynïasoh, bad ki lad ki lynti ha kylleng ka jylla Assam – ban pynkhlaiñ ïa ka bynta jong ka kum ka khyrdop sha ka thaiñ Southeast Asia.
Ki projek ba kongsan ki kynthup – Ka jingkyntiew ïa ki jingdon jingem jong 65 tylli ki ïing skul ba thymmai – T.455 klur. Ka jingkyntiew ïa ka surok Chayagaon-Ukium – T.102.69 klur. Ka jingkieng RCC ha Silonijan-Dhansiri Par Ghat – T.20.59 klur, ka jingkyntiew ïa ka jaka karkhana ha Ramphalbil (Kokrajhar) – T.14.40 klur. Ka jingkyntiew ïa ka jaka karkhana ha Lakhibazar (Baksa) – T.18.40 klur.
Haba pynpaw ïa ka jingïoh myntoi ki briew, u Scindia u la ong, “Man la u maw-it ba la buh bad man la ka kamra-pule ba la shna ka dei ka jingkular ba la pyndep ha ka jingshakri ïa ka jingangnud.”
Ka NEST CLUSTER ha IIT GUWAHATI: Ka jaka pdeng jong ka kam saiñdur thymmai ka NE
Ka North Eastern Science & Technology (NEST) Cluster, kaba la seng da ka jingbei tyngka kaba T.22.98 klur, kan treikam kum ka jaka pdeng jong ka jinsaiñdur thymmai jong ka thaiñ shatei lammihngi – ban pynkylla ïa ka jingstad jong ka thaiñ sha ki lad pynbeit na ka bynta ka pyrthei. Kan pynleit jingmut ha ki saw tylli ki bynta: Ka Jingsaiñdur thymmai naduh ki jaka nongkyndong; ki Semiconductor & Artificial Intelligence; ki teknoloji ba ïadei bad ki kam siej; Ki plastik kiba lah ban pynduhjait.
Ka NEST Cluster kan ïarap ïa ki prokram jong ka DoNER kiba pynshong nongrim ha ki samla kum ka NE-SPARKS bad ka Ashtalakshmi Darshan, ha kaba 3,200 ngut ki samla pule na kylleng ka India kin leit jngoh ïa ka thaiñ shatei lammihngi, katba 800 ngut ki samla pule na ka thaiñ shatei lammihngi kin leit jngoh ïa ki jingstad sañan ha ka ISRO.
Ka jingpyni ia ka jingwad bniah bad ka technology.
Ha ka jingleit jong u sha ka exhibition jong ka IIT Guwahati, u Myntri u la ïakren bad ki samla pule bad ki nongwad bniah kiba pyni ïa ki jingsaiñdur thymmai ha ka 6G communication, ki polymer kiba lah ban pynduhjait, ka bamboo tissue culture, bad ki kor MRI kiba rit na ka bynta ka jingsumar kaba lah ban ïoh.
Haba bishar bniah ïa ka projek biodegradable polymer, u Scindia u la ong, “Lada phi sdang ïa kane, kan long ka lawei,” da kaba ïaroh ïa ka mynsiem jong ki samla pule ban kwah tip shaphang ka saïan bad ka jingsaiñdur thymmai kaba lah ban ïaineh.
Kum shi bynta ka jingthmu jong ka NEST Mission halor ka jingsaiñdur thymmai kaba kynthup ïa baroh, la pynkup burom ïa 30 ngut ki longkmie na ki shnong ha Kamrup Distrik namar ba ki la pyndep ïa ka jinghikai ha kaba shna ïa ki jingïalehkai biodegradable da kaba pyndonkam ïa ki teknoloji Industry 4.0. Mynta kin ïoh ïa ka jingkyrshan ban seng ïa la ki jong ki karkhana barit.
U la plie paidbah ruh ïa ka logo jong ka NEST Cluster, kaba la shna itynnad da ki longkmie nongkyndong kiba la shah hikai ha ka kam shna jingïalehkai kiba ïaineh, kaba pyni ïa ka jingngeit ha ka jingsaiñdur thymmai kaba don tynrai ha ka jingïakynthup lang bad kaba la pynkupbor da ka Nari Shakti.
Ka jingkylla jong ka Assam hapoh ka Samoi jong u Modi
U Scindia u la ban jur ba hapoh ka jingïalam ba ïohi jngai jong u Myntri Rangbahduh ka ri u Narendra Modi, ka thaiñ shatei lammihngi ka la mad ïa ka jingkylla kaba khraw na ka thaiñ ba la sahkut sha ka bor ba la pynïasoh bad kaba la pynkhreh na ka bynta ka lawei.
Palat T.6.2 lak klur la bei tyngka ha ka thaiñ lyngba ka Gross Budgetary Support policy kaba 10%, kaba kyntiew ïa ka roi ka par, ka kam khaïi bad ka jingpynkupbor. U la ban jur ïa ki projek ba kongsan kum ka Jingkieng Bogibeel, ka Bhupen Hazarika Setu, Sela Tunnel, bad ka Jogighopa Multi-Modal Logistics Park, kiba la pynkylla dur ïa ka jinglong jingman jong ka jingpynïasoh ha Assam.
U la bynrap ruh ba ka Act East Policy ka la plie ïa ki lad khañi pateng kiba thymmai, kaba la pynduna ïa ka por leit jingleit hapdeng ka Kolkata bad Agartala na ka 31 kynta sha tang 10 kynta lyngba ki lynti rel bad ki surok ba thymmai ban pynïasoh bad ka Bangladesh.
U Myntri u la kren ruh shaphang ki projek ba dang shen jong u Myntri Rangbahduh Modi kiba shongdor T. 6,500 klur ha Darrang bad T.18,530 klur ha kylleng ka Assam, kaba pynskhem biang ïa ka jingangnud jong ka Sorkar Pdeng na ka bynta ka roi ka par kaba pura kaba kynthup ïa ka koit ka khiah, ka pule puthi, ka bording, bad ka kam karkhana.
Ka jingsdang ba thymmai na ka bynta ka Viksit Purvottar
U Scindia u la ong ba ka thaiñ shatei lammihngi, kaba la ju ïohi kum ka thaiñ ba don ha ki khappud, mynta ka la long ka khyrdop phang mihngi jong ka India sha ka roi ka par. U la ïaroh ïa ka jinglong jong ka Assam kaba ong “Xobhexokoloreloithokaxomaj” – ka imlang sahlang kaba kdup lang ïa baroh bad ong ba man la ka projek ba la plie mynta ka sngi ka pynkhlaiñ ïa kata ka jingïatylli.
Haba kyrpad ïa ki jingkyrkhu jong ka Maa Kamakhya, u la pynpaw ka jingngeit skhem ba ka Assam kan ïai bteng ban ïalam ïa ka jingïaid jong ka thaiñ shatei lammihngi sha ka Viksit Bharat @ 2047 lyngba ka bor ba ïatylli jong ka jingnang jingstad, ka jingsaiñdur thymmai, bad ka jingseng kam seng jam.
