Yn pynbeit ïa ka kynrum kynram sam bording ha Mawsynram khlem da pynkheiñ hukum ïing Bishar : Metbah

Shillong, Jylliew 5 : Ka Sorkar Jylla kan shim ïa ka sienjam ban pynbeit ïa ki jingud jingnam jong ki paidbah ka Mawsynram Sub-Division ba ïadei bad ka jingai sam bording ha ka kompani (franchisee), hynrei kan leh phikir bha ïa ka kam namar ka jingdon ka mukotduma ha ïing Bishar, ong u Myntri kam bording Bah Metbah Lyngdoh ha ka sngi Thohdieng.
U Bah Metbah ula ong ba ka jingpynleit jingmut jong ka Sorkar ka long halor ka jingpynbha ïa ka jingai jingshakri, hynrei ki jingeh ki la mih ha kane ka rukom pynïaid ba mynta.
“Ka jingthmu hi ka long ban don ïa ka rukom ai jingshakri kaba biang khnang ban pynthikna ïa ka jingai jingshakri ba kham bha sha u paidbah ka Jylla, Hynrei ha ka jingïaid ka kam, katto katne ki jingeh ki la mih” ula ong.
“Ngi la ïashong jingïalang bad ka Tnad lem bad ka Corporation bad ngi la ïakren ïa baroh kine ki jingeh ba la pynsngew da ki seng bapher bapher” ula bynrap.
U Bah Metbah u pyntip ba ki MLA kynthup u MLA ka Mawsynram Bah Olen Sing Suin, MLA ka Ranikor Bah Pius Marwein bad MLA ka Mawphlang Bah Beyondstar Kurbah ki la ïakynduh ïa u haduh arsien kynthih ban pynsngew ïa ki jingud jingnam jong u paidbah.
“Ki la ïakynduh ia nga la arssien bad pynsngew ïa ka jingsngewkhia ki nongthang ding kiba la mad jingeh na ka por sha ka por ha ka rukom ïoh bill, ka jingpynlip bording bad ki jingshakri bapher bapher kiba dei ban ai” ong u bah Metbah haba ïathuh “Ka rai ïa kane ka kam ka la dei ban mih la katto katne bnai mynshuwa, hynrei la pynkynriah namar ka jingdon ka mukotduma hapoh ka ïing Bishar High Court”.
“Ngi la dei ban shim rai naduh ki bnai ba la leit, hynrei namar kane ka kam ka don ha ïing Bishar High Court, ngi la hap ban leh husiar bha. Kano kano ka rai ba shim da ka Sorkar kam dei ban ïaid pyrshah ïa ka kam kaba la tian bishar hapoh ka ïing Bishar” ula ong.
U Bah Metbah u pyntip ba u Myntri Rangbah ka Jylla u Conrad K Sangma ula ai ka jingbthah ïa u ba un pynïaid beit shakhmat ïa ka kam. “Namar ngi sngewthuh ïa ka jingeh ba la mad da ki nongthang bording katei ka thaiñ, nga la ïakynduh biang ïa u Myntri Rangbah bad pyntip ha u ïa baroh ki jingsngewkhia”. Ula ong ïa nga “Sngewbha khmih ïa kane ka kam bad pynïaid beit shakhmat bad kano kano ka rai kaba donkam ban shim. Kane ka dei kaba ula bynshet ha nga” ong u Myntri.
“Halor kane, nga la bthah ïa ka Tnad ban peit ïa kaei kaba ngi lah ban leh ban pynthikna ba ka Corporation kan ym ktah ïa kam ba don bad ka ïing Bishar” ula bynrap.
Ki paidbah ka Mawsynram sub-division ki la ujor la bunsiem ïa ka jingthurmur ka rukom sam bill, ka jingpynlip bording khari khari bad ka jingbym biang ka rukom ai jingshakri jong ka kompani SAI.