Ai pynïaid biang ha ka MePDCL, na u CM kyrpad nongïalam NPP na Mawsynram, Mawphlang bad Ranikor

Shillong, Jylliew 05 : Ki nongïalam jong ka National People’s Party na ki lai tylli ki Block ki la kynduh markhmat ïa u Myntri Rangbah ka Jylla Conrad K Sangma ha ka step sngi Thohdieng da ka jingkyrpad ban aiti pynïaid biang ha ka MePDCL ha ka rukom sam bording bad pyndam noh mardor ïa ka kontrak bad ka kompeni ba mynta.
Kane ka kynhun hapoh ka jingïalam jong u Bah HM Shangpliang bad Bah Alvin Sawkmie ki la pynpaw ha u Myntri Rangbah ïa ka jingud jingnam kaba jur na ki paidbah haba ïadei bad ka jingïoh jingshakri haba ïadei bad ka bording kumjuh ruh halor ka rukom poi ka bai bording kaba la ktah jur ïa ki paidbah nongshong shnong.
Ki la kynnoh ruh ba ka bai bording ha Mawsynram Sub-Division ka dei kaba heh tam lada nujor bad kiwei ki jaka.
Katkum ka dorkhas ba ka kynhun ka ai sha u Myntri Rangbah la kdew ruh ba ka kompeni kam shym lah ban bujli ne maramot ïa ki post elektrik. Ki nongïalam ka NPP ki la kynnoh ba ki paidbah ki la duh lut ïa ki skim ba wan na ka tnad bording kum ka RDSS kaba ju don mynshwa ha ka por ba dang hap ha ka jingpynïaid jong ka MePDCL.
Ki la ong ruh ba lada ka sorkar kam tuklar ïa kane ka ishu kan sa pynlong ïa ki paidbah ban duh ka jingshaniah ha ka sorkar khamtam ha kine ki lai tylli ki block jong ka Mawphlang, Mawsynram bad Ranikor.