Per ki dohkha ba ïap bad ba la jan ïap ha sla um ha ka wah Lukha, ym lah ban tip na kaei ka daw, kyntu ïa ki paidbah ban ym bam kulmar

Khliehriat Lber 22 : Ki dkhot jong ka Khasi Students Union Narpuh Circle lem bad ki nongshong shnong jong ka shnong Sonapyrdi, mynta ka sngi ki la sakhi ïa ka jingïap pathar ki dohkha ha ka wah Lukha kiba la per halor sla um, ki don ruh ki dohkha kiba la jan ïap ki bym lah shuh ban jngi, na ka liang ka seng ka la pynpaw ka jingsngew khia jur halor kane ka jingiap ki dohka bad ki dkhot ka seng da lade hi ki la leit hiar bad sakhi ïa kane bad ka seng kan sa shim leit ruh ban ujor sha ki bor ba halor ban wad bniah ïa ka daw jong ka jingïap pathar ki dohkha.
U President jong ka KSU Narpuh Circle, u bah K.S.Suchiang, u la ïathuh ba u la lap ba ki don bun ki briew kiba la leit hiar sha wah Lukha ban khar ne tam ïa ki dohkha kiba la ïap bad kito kiba la jan ïap ba kin bam “Haba pyrshang ban kylli kaei ka daw ba ki dohkha ki ïap, ki katto katne ngut ki nongshong shnong ki la ïathuh ba ka dei ka jingther jur u slap ha kine ki ar- lai sngi, namar ba dei u slap nongkong, kumta ki jakhlia (waste) baroh kiba mih na ki kharkhana dewbilat kum ki fly ash , gypsum, dewïong, na u maw shun bad kiwei kiwei ki jakhlia ki wan tuid sha ka wah Lukha, ki la ong ruh ba kane ka shait jia hi manla u snem ha kum kane ka por” ong u bah Suchiang.
“Halor ka jingsngew khia ïa ka koit ka khiah jong ki paidbah, ka seng ka kyntu ïa ki paidbah ban kiar ban bam ïa kitei ki dohkha ba ki tam na ka wah Lukha, ïoh kan ktah pynban ïa ka koit ka khiah, namar kumba long mynta, ki kynthei, ki khynnah ruh ki la hiar sha wah Lukha bad ki la muja ka tong dohkha” la bynrap.
“Na ka liang ka KSU Narpuh Circle, ngi sngew diaw haba ngi ïohi ïa kane ka jingiap ki dohkha, te ngi pynpaw ba kane ka ju jia na ka por sha ka por, ki jakhlia kiba tuid, ki wan tuid nyngkong ha ka wah Lunar te yn da kane ka wah ka ïatyngkhuh bad ka wah Lukha, kumta ka wah Lukha ruh ka jakhlia lang bad ka um ka la kylla long bih bad ki dohkha kiba rit ba ria ki la ïap lut,
“Ka seng ka la ju kyntu ïa ka sorkar kan leh eiei halor kane ka jingiap ki dohkha kaba ju jia man ka por, te mynta ruh ngin hap shim biang ïa ka synjam ba ngin leit ban ujor sha ki bor sorkar, sha ka ophis u Deputy Commissioner ka East Jaiñtia Hills District ba dei ban wad bniah bha ïa ka daw jong ka jingïap pathar ki dohkha ha kane ka wah Lukha kaba ju jia man ka por”
Kum ban shu bynrap, ki bor district jong ka East Jaiñtia Hills District, myn ha ki snem ba la leit, ka la shim khia ban pynkhuid pat ïa ka wah Lukha, ha ka jinglut kaba la kot sha ka T2.5 klur tyngka kaba bei tyngka lyngba ka District Mineral Funding Trust, la pyntrei ïa kane ka project pynkhuid wah lane ka River Rejuvination Project da kawei ka kynhun jong ki Scientist jong ka Trinity International Implex Delhi, la lap ba kane ka jingpynkhuid ïa ka wah Lukha kaba la kylla sniew, ka la long kaba sei soh bad kaba jop ha kaba ki dohkha bad ki jingthaw kiba im hapoh um ki la don bad ka um ruh ka la sdang ban khuid, ïa ka wah la pynkhuid da ki kynja jingthung kum ki sohpailen ba la tip ruh kum ki Algae, kane ka Project ka la long kaba jop, hynrei ym lah shuh pat ban tip na kaei ka daw ba ki dohkha ki la sdang biang ban ïap ha kane ka wah Lukha, na ka liang ka KSU Narpuh Circle bad ka Sonapyrdi Tourism and Economic Development Society (STEDS), ka la ju pynpaw ïa ka jingangnud ban pynneh pynsah ïa kane ka wah Lukha bad ïa ka mariang sawdong, kumjuh ruh ban kyntiew ïa ka kam jngohkai pyrthei ha ka thaiñ, namar kane ka wah Lukha ka long kaba ju khring ïa ki nongwan jngohkai pyrthei na kylleng, kumta na ka liang ka seng bad ka Society ka khmihlynti ba ka sorkar bad ki bor district kin shim khia ban pynneh pynsah ïa ki um ki wah, ïa ka mariang bad ïa kiei kiei kiba don ha ka mariang, kiba don ha ka thaiñ.