Sngewkhia ka CoRP ba duna ki kam pynroi ka sorkar Meghalaya ha ki Shnong ba kajia pud ha Block II

0

Nongpoh, Lber 22: Da ka jingsngewkhia kaba jur halor ki jingduna ki kam pynroi ba ka sorkar Meghalaya kam lah ban pynpoi sha ki shnong nongkyndong ha khappud ka Ri Bhoi ba hap ha ka thaiñ Khappud Block II, ka Confederation of Ri Bhoi People (CoRP), Sengkmie ha ka sngi nyngkong jong ka taiew ka la hiar ban leit jurip sha ki Shnong khappud ba ka la pynpaw ka jingsngewkhia ba ki paidbah ki shah iehnoh bein ha ka liang ki kam pynroi.
Ha ka jingïalam u President ka Sengkmie, u Bah Bandari Ryntathiang lem bad ki dkhot ka seng ha katei ka sngi ka la hiar shaduh ka shnong Umlaper bad kaei kaba kum ka seng ka pynpaw ka jingsngewkhia, ka dei namar ba ha kitei ki shnong khappud ba dang ïa kajia pud hapdeng ka Assam bad Meghalaya kiba bun ki kam pynroi la wan rah da ka sorkar Assam ban ïa ka sorkar Meghalaya.
Kumba la ïathuh da u Bah Bandari Ryntathiang, u la ong haba leit ban jurip ïa ka Shnong Umlaper kaba sngewphylla ka long ba bun ki kam pynroi kiba heh la wan rah da ka Assam ba kynthup naduh ka Stadium bad ki Indoor Stadium bad kaba sngewsih ka long ba na ka liang ka sorkar Meghalaya pat kam lah satia ban wan rah ïa ki kam pynroi kumba la leh da ka Assam.
U la pynpaw ruh da kaba ong ba bun hi ki nongshong shnong ha kitei ki shnong khappud ki dei ki Khasi bad kiba angnud ruh ban don beit ha ka jylla Meghalaya, namar naduh ki dulir khyndew ne ki kot ki sla ban pynshisha ki dei kiba don sha ka jylla Meghalaya bad ym sha ka jylla Assam.
U la pynpaw ruh ba kiwei ki jaid bynriew bym dei Khasi tang ban shongsuk shongsain kim salia wat lada dei ban hap sha Assam bad ki jaid bynriew Khasi hi baroh ki angnud ban don sha ka jylla Meghalaya.
Na ka liang ka seng u la kyntu ruh ïa u Bah Prestone Tynsong, symbut kongsan ka jylla ba u dei ban da pyrkhat bha shuwa ban kren halor ki kam pud ki kam sam bad ym dei ban ngiat jubor ba ka Bloc II ka dei sha Assam bad shuwa ban shim ïa ka rai ha kaba ïa dei bad ka jingpynbeit pud ruh dei ban lum ban lang shuwa ïa ki paidbah nongshong shnong, ki nongïalam Shnong, ki nongïalam Raid bad Hima khnang ban tip ïa ka jingshisha ba kitei ki shnong khappud ha Block II ba ki dang dei sha ka jylla Meghalaya.
U la ïathuh ruh kumba la paw, ka sorkar Assam ka ïaleh ban wan rah ïa ki kam pynroi tang ha kito ki jaka ba don ka jingïakajia pud bad ka thong hi ka long tang ban ioh ban klun ïa ki jaka puta jong ka jylla Meghalaya.
Namar kata, kum ka seng ka kyntu ïa ka sorkar Meghalaya ba ka dei banphai khmat kyrpang naduh ki kam pynroi sha kitei ki shnong khappud bad shuwa ba kan shim ïa kano kano ka rai ruh ka dei ban da lum da lang naduh ki Rangbah Shnong, ki Sordar Shnong, ki Synjuk Rangbah Shnong, ki Syiem Raid Nongtung ban tip ïa ka jingshisha, u la bynrap.

Leave A Reply

Your email address will not be published.