Nongpoh, Lber 22: Ban ïa snoh kti ha satlak ka pyrthei bad ruh ban don kata ka thong ban pynneh pynsah ïa ka umbam umdih kaba long ka jingdonkam ba hakhmat eh jong baroh ki kynja ba im ha sla jong kane ka pyrthei, ka ophis u Executive Engineer ka tnad PHE, Nongpoh mynta ka sngi ka la pynlong ïa ka jingrakhe ïa kane ka sngi ba kyrpang ba la tip kum ka World Water Day ha District Library Hall, Nongpoh.
U Additional Deputy Commissioner ka Ri Bhoi, u Bah M.B Tongper u la wan ban shim bynta kum u kongsan ban rakhe kane ka sngi kyrpang ha ryngkat ka jingdon lang u Bah W. Lyngdoh, Executive Engineer, Water Resources Department, u Bah U . Kurbah, Executive Engineer, PHE Nongpoh Division, V. W Momin SE, PHE Nongpoh,, u Bah E Dkhar, EAC bad uba dei u BDO Umling Block bad ryngkat ka jingdon lang ki khynnah skul bad ki nonghikai ban pynphuh pynphieng ïa kane ka jingrakhe ïa kata ka ‘World Water Day.
Ha kane ka sngi naka liang ki khynnah Skul naki skul bapher bapher bad ki Village Organisation ki la wan ban ïashim bynta haka jingïakop pyni ïaki jingshna kumno ban tyngkai ïaka Um, ïaka ba la tip kum ka ‘Jal Jeevan Mission Exhibition’ bad naka liang ki nongpynïaid ki la ai ruh ïaka khusnam sha ki nongjop hakaba ka kynhun Ïasnohktilang Village Organisation ka la long ka nongjop ha kane ka jingïakop, ka St. Paul’s Hr. Sec. School ka lawan haka kyrdan ka baar bad ka St. Mary’s Sec. School ka la wan haka kyrdan ka balai.
Lyngba jong kane ka sngi ban pynshlur ïaki nongïashim bynta la ïoh ruh ban sam ïaki khunsam sha ki nongïashim bynta haka jingïakop rwai tynrai bad la ïoh ruh ban sam ïaki khusnam shaki nongjop kiba la wan ban shim bynta haka jingïakop Marathon kaba 5 km.
Haba kren ha kane ka snig kum u kongsan, u Bah MB Tongper, Additional Deputy Commissioner ka Ri Bhoi u la ong ba kine ki jait program ki long kiba donkam ban pynlong man ka por ha man ki jaka khnang ba ki briew kin tip ïaka jinglong jingman jong ka Mariang hakaba ïadei bad ka Umbam Umdih.
U la pynpaw ruh da kaba ong ba ka United Nation ka la buh ïaka Program kaba la tip kum ka Sustainable Development Gold bad ha kane la kynthup haduh 17 tylli ki jingthmu ban pynneh pynsah bad haka ba 6 napdeng kitei ki 17 tylli la kyntup ruh ïaka umbam Umdih kata ka “Clean Drinking Water”.bad ka jingthmu jong ka United Nation lyngba kane ka program ka long ruh ban pynneh pynsah ïaki umbam Umdih bad ki tyllong um ki ba khuid bad ki ba long kiba bit ban dih.
U la ong ruh bunsien ba ka jingkwah rhah ïaka spah jong ngi ki briew haduh ban pynjot ïaka mariang ka la wan rah pynban ïaka jingtyrkhong bad jingkyrduh haka umbam Umdih, u la pynpaw ruh ïaka jingsngewdiaw dakaba ong ba, 2 billion ngut ki briew kim ïoh ïaka um kaba bit ban pyndonkam bad lano mangi ki briew ngin sngewthuh ïaka jinglong kyrpang ban pynneh pynsah ïaka mariang bad lada ngi khwan tang ïaka ba mynta bad ngi pynjot ïaka mariang ki lawei jong ki kin im kumno bad naei kin ïoh ïaki tyllong um kiba long kiba bit ban pyndonkam.
Shuh shuh, u la ban khia ruh da kaba kyntu ïa baroh ki nongwam ha katei ka program ba ngi dei ban tip ïaka jinglong kyrpang ka mariang bad ngi dei ban wat ki lad ki lynti ba kumno ngin ïaleh ban pynneh pynsah ïaka mariang, khnang ba ngin nym kyrduh ïaka um kaba khuid bad ki lawei kin nym ngat haka apot kaba sniew lyngba ki jingkwah spah rhah jong ngi, u la bynrap.
