Shillong, Lber : Na ka liang u president jong ka seng nongrep Hynñiewtrep Border Area and Farmer Association (HTBAFA) Wahlakhiat u Bah SB Sban Khongjoh u la ong ba ka jingjur jong u slap ha kane ka taiew ba la dep ka la kit bad jynrat lut ïa ki jingkieng rit bad ïa ki jingshna jong ki nongrep kum ki jingpynap dohkha ne kyllong hapoh ka wah Umsi ha ka 21 tarik mynta u bnai.
U la ong ruh ba na ka liang ki paid nongrep kiba kamai lyngba ki doh um doh wah lyngba ki kyllong kiba ki ju pynap ki la shah rong lut ha ka wah Umsi.Kumjuh ki nongrep ki ba hap ban ïaid lynti na shiliang sha shiliang jong ka wah Umsi ruh kim don lynti shuh naba ka jingkieng kaba ki shna ka la shah rah noh ha ka um ha katei ka sngi.
Na ka liang u president ka seng u pynaw ka jingsngewlem halor kane ka jingduh jong ki paid nongrep halor kane ka jingeh kaba ki ïakynduh.
