Shillong, Nailar 25: Ka Seng Voice of the People Party (VPP) ka la pdiang ïa ka jingthung ka Sorkar ïa u Chairperson bad ki dkhot ka Expert Committee ban pynbha ïa ka Reservation Policy.
Haba ïakrem bad u Dr. Batskhem Myrboh, Nongaiktien jong ka Seng, u la ong ba kumba ka Party ka la ïalam ïa ka jingdawa ban pynkylla ïa ka Reservation Policy bad tyrwa ruh ban thung da ka Expert Committee, ka pdiang ïa ki briew kiba la thung da ka sorkar, namar ki la don lut ha kane ka Komiti naduh ki Nongbishar, ki Nonghikai University bad kiwei kiwei khamtam eh kiba tip bha ïa ka kam. “Ngi pdiang ïa ki dkhot kiba la thung da ka sorkar”, u la ong.
Hynrei u la pynpaw ka jingbym ïahap pat ïa ka jingbuh por ka sorkar haduh shi snem ban pyndep ïa kane ka kam, namar u ong ba kam dei ka kam kaba da eh haduh katta katta, la kumno kumno hynriew bnai ka la biang bha ban pyndep. Hynrei u la ong ba ka Party kan sa ïakren bha ïa kane ka kam ynda ka la shong jingïalang.
Ha kajuh ka por u Nongaiktien ka VPP, u la ai khublei sa shisien ïa i paidbah kiba la ai ka jingkyrshan ha ka jingïakhih jong ka Party ban dawa pynkylla ïa ka Reservation Policy bad kane ka jingthung ka Sorkar ïa ka Expert Committee bad ïa ki dkhot jong ka, kadei ka jingjop hi jong u paidbah.
Haba la kylli la ka Party kan phah ne em ïa ki jingai jingmut kumba la leh da kiwei ki Party, u Dr. Batskhem u la ong ba ka Seng ban sa peit halor kane bad kan peit ruh ha kano ka rukom kane ka Committee ka treikam. “ïa mynta hi ngim pat lah ban ong eiei”, u la ong.
Lah ban kdew hangne ba ka jingïalang jong ka Kynhun Myntri kaba la long mynta ka sngi, ka la mynjur ïa ki dkhot jong ka Expert Committee on Reservation Policy, kiba kynthup ïa u Retd. Justice Mool Chand Garg kum u Chairperson, u Justice ( Retd.) Satish Chandra, u expert ha ki kam aiñ, u Prof. DB Kumar, u expert ha ka Sociology na NEHU, u Prof Chandra Shekhar, u expert ha ka Population Studies, na ka Indian Institute of Population Studies, Mumbai bad u Prof Subhadeep Mukherjee u expert ha ka Economics na IIM, Shillong.
