Dawa ki nongtrei trai jylla ka Topcem ban weng kam ïa ar ngut ki nongtrei bar jylla

Khliehriat, Nailar, 25: Ki nongtrei trai jylla kiba don hapoh ka shatri jong ka Topcem Employees Association (TEA) ha ka sngi Thohdieng ki la dawa ban sospon bad ban wengkam mardor ïa ki arngut ki nongtrei bar jylla jong ka M/s Meghalaya Cements Limited, Thangskai halor ka jingkren da ki ktien khlemakor bad ka jingkynshoit ïa ki Pulit ban kawut lathi naphang ïa ki nongïakhih kiba pyrshah ban pynlong ïa ka Public Hearing jong ka M/s Meghalaya Cements Limited, Thangskai ha ka sngi Palei.
Ka TEA ka la aiti ruh da ka jingthoh ha u President jong ka Topcem Thangskai.
Ki arngut ki nongtrei bar jylla kiba kren da ki ktien khlemakor ki dei kiba la tip kyrteng kum u Arun Kejriwal-AVP, Corporation Affairs bad u Umesh Yadav uba dei u G.M-Mines.
U President jong ka TEA, u Bah D.Malang lem bad ki dkhot ka Association ki la pynpaw ka jinsgngew bitar halor ka jingkren khlemakor jong ki arngut ki nongtrei bar jylla bad ong, “ngi la aipor tagn 24 kynta ba ki dei ban panmap mardor kata ha ki ladpathai khubor.”
Na ka liang ki kynthei kiba dei ki dkhot jong ka TEA ki la pynpaw ruh da kaba ong, “ngi ïohi ïa kaba la jia hynnin ka sngi, ka long kaba sngewsih ïa ngi kum ki trai shnong, trai jaka ba ki briew kiba nabar ki wan ban maham ïa ngi da ki ktien kiba ngim sngewtynnad, da kaba ong ‘Maro Sub Ko’. Kaei ka jingmut jong ki halor kane. Ngi ki nongtrei trai jylla ngi dawa ba dei ban beh kam noh ïa ki mardor hi namar ka jingkren jong ki ka long kaba ngim lah ban pdiang namar da kine kiba wan nabar kin wan ban pynklumar bad pyntieng pynsmiej ïa ngi kum ki nongtrei hangne ha Topcem Cement Ltd.”
“Ngi kyrpad ïa ka Sorkar ruh ba kan shim khia halor kane ka jingjia kumba paw ha ki lad pathai khubor ba la mih ka dur jong kito ki briew kiba la kren khlemakor khamtam hynnin ha ka por ba ki kren nga don ha kato ka jaka. Ngam lah ban pdiang kum ka longkmie. Nga kyrpad ba dei ban shimkhia ïa kaba jia hynnin ka sngi. Bun na ngi ruh kiba la mynsaw, ha kaba u Pulit u la bom wat ïa ki kynthei, khynnah ruh, ïa kane ruh ngim lah ban pdiang,” pynpaw kawei ka longkmie
U kurim jong ka longkmie kaba la mynsaw jur na ka kti, u la dawa ba ka kompeni ka dei ban siew bailutskan na ka bynta ban phah sumar namarba la rah ïa ka longkmie ba la mynsaw ban phah sumar ha Woodland Hospital, Jowai hynrei kane ka hopsital kam treh shuh ban sumar bad la bthah ban rah noh sha Supper Care Hospital, Shillong
U la pynpaw ruh ka jingdiaw namar ka jingban ka jingkyrduh da kaba ong, “ngam don pisa ban rah sha Super Care, mynne la shu sop noh da ki dawai kynbat” u la ong.