Khlieh u Justice (Retd) Garg ïa ka Expert Committee ban khmih bniah ïa ka Reservation Policy
Shillong, Nailar 23: Ka Kynhun Myntri jong ka Sorkar Jylla ha ka sngi Thohdieng ka la mynjur ïa ka Expert Committee ka ban khlieh da u Justice (Retd) Mool Chand Garg kum u Chairman.
U Justice (Retd) Mool Chand Garg u dei u nongbishar ba la shongthait jong ka Madhya Pradesh High Court .
Ki dkhot jong ka Expert Committee kiba tip shaphang ki aiñ jong ka ri ki long u Justice (Retired) Dr. Satish Chandra uba dei u nongbishar barim jong ka Allahabad High Court bad u President barim jong ka Custom, Excise and Service Tax Appellate Tribunal.
Kiwei pat ki kynthup ïa u Prof D.V Kumar na ka Department of Sociology, NEHU, Shillong kum u Expert Member ha ka Sociology, u Prof. Chander Shekhar na ka Department of Fertility and Social Demography, Indian Institute of Population Sciences, Mumbai kum u Epert Member ha ka Population Studies bad u Prof Subhadip Mukherjee uba long u Assistant Professor jong ka Economics and Public Policy ha IIM, Shillong kum u Expert Member ha ka Economics.
Ki kyndon treikam jong ka Expert Committee ka long ban khmih bniah ïa ka Reservation Policy bad ban ai ïa ki jingkynthoh. Lada donkam, kane ka komiti kan hap ban lum ruh wat ïa ki kynhun bapher bapher bad ban leit jurip ruh ïa ki bynta bapher bapher jong ka Jylla khnang ban ïoh na ka jingai jingmut na kiba bun balang.
La bthah ïa ka Expert Committee ban aiti ïa ka kaiphod sha ka Sorkar Jylla hapoh 12 bnai.
Ïa ka Expert Committe la thaw hadien ba ka Komiti kaba kynthup ïa baroh ki seng saiñpyrthei la thaw ha ka 25 tarik, Jymmang, 2023 ban ïakren halor ka jingpyntreikam ïa ka Reservation Roster system.
Ha ka jingïalang bad ha ka jingïathir ïatai, ka Committee ka la ai jingmut sha ka Sorkar ban thaw ïa ka Expert Committee ka ban khmih bniah ïa ka State Reservation Policy.
Ka Sorkar ka la pynmih ïa ka jingpynbna ba la thaw ïa ka Expert Committee ban khmih bniah ïa ka State Reservation Policy, ha kaba ki riewshemphang ki long kiba tbit ha ka Constitutional Law, Economics, Sociology bad Demographic Studies.
Ïa ki dkhot jong ka Expert Committee la bynshet ban wad ha Search Committee ba la khlieh da u Chief Secretary hadien ba la pynmih ïa ka jingpynbna ha ka 13 tarik, Jylliew, 2023.