Pdiang ka VPP ïa ka jingkhot ïakren ka Sorkar, tangba yn bteng ka jingshah thngan u Bah Ardent

By Mawphor News Desk On May 31, 2023

Shillong, Jymmang 30: Da ka jingpdiang ka sorkar ban pynheh bad pynïar ïa ka jingpyrkhat kam ka Committee on Roster System ba la lam khmat da i Dr. Ampareen Lyngdoh, Myntri, ka Committee ka la lum ïa ka jingïalang jong baroh ki Seng Saiñpyrthei ha ka 31 tarik mynta u bnai ha ka por 2:30 nohphaisngi ha Secretariat.
Ka Seng Voice of the People Party (VPP) ha kaba la thung ruh ïa u Bah Ardent Miller Basaïawmoit, President ka Party kum uwei na ki dkhot jong kane ka Committee, ka la pdiang ïa kane ka jingkhot ka sorkar bad ka la rai ban leit sha kane ka jingïalang namar ba la kynthup lang ïa ka mat jong ka Reservation Policy.
“Ka Seng ka la rai ban leit sha kane ka jingïalang ba la khot da ka sorkar, tangba ka jingshah thngan jong nga kan bteng”, la pynbna u Bah Ardent ha jaka ba shah thngan hapdeng ka jingrisa jong ki hajar ngut ki paidbah kiba ïalum hajan Addl Secretariat, da kaba pynshai ba ka jingbteng ka jingshah thngan kadei namar ba ka Party ka la rai ba u President un shah thngan tad haduh ba ka sorkar kan mynjur ban pynthymmai ïa ka Reservation Policy.
“Ngi dei ban ïoh ïa kaei kaba ngi dawa ban khmih bniah biang ïa ka Reservation Policy,” ong u Bah Ardent.
“Ka party ka la rai ban leit sha ka jingkhot ïakren bad ka sorkar ka dei ban mynjur ban khmih bniah ïa ka Reservation Policy lym kumta ngan ym mih na kane ka jaka, ngan bteng ïa ka jingshah thngan,” u la bynrap.
“Ka Sorkar ka kwah ba kane ka jingïakhih kan khluit noh bad lada ka don ka jingkhluit kan don ka jingkulmar bad lada ka kulmar ka dei ka Sorkar ka ban kmen. Ngin ym shah riam ha ka jingkwah jong ka Sorkar. Ngi lah ban dom bad ban bitar ba u Bah Ardent u la shah thngan la phra sngi, hynrei ngin ym liat ha ka jingriam jong ka Sorkar,” ong u Bah Ardent.
U la ong ruh watla ka Sorkar ka la khot ïakren hynrei ka VPP kan ap ïa kaei kaba mih na ka jingïakren lada ka jingïakren kam pynhun ngin bteng ïa ka jingïakren
Shuwa kane, ka Dr. Ampareen Lyngdoh kaba long ka Chairperson jong ka Komiti lyngba ka video ba la phah sha ki lad pathai khubor, ka la ïathuh ba ka Sorkar ka la pdiang ïa ka jingtyrwa ka Committee kaba la shong ha ka sien kaba nyngkong ban pynïar ïa ka jingtreikam jong ka da kaba kynthup lang ïa ka jingïakren halor ka jingpyntreikam ïa ka Reservation Policy nalor ka Roster System.
“Nga sngewkmen ba ka sorkar ka la pdiang ïa kane ka jingtyrwa bad nga kyrmen ba ngin lah ban weng noh ïa kane ka jingeh kaba la ktah ïa ka leit ka wan jong ki paidbah ha kine ki sngi”, la ong ka Dr. Ampareen.
Kane ka Committee ka kynthup ruh ïa u Dr.WR Kharlukhi, State President ka NPP, u Bah Renikton L. Tongkhar,MLA ka UDP, u Bah KP Pangniang, President ka HSPDP bad kiwei ki long u Zenith M Sangma-AITC, HM Shangpliang-BJP, Augustine Marak-GNC, Ronnie V Lyngdoh-INC, Pyndapborthiaw Saibon-KHNAM, Chief Secretary ka Jylla bad u Commission & Secretary ka Tnad Political kum u Member Secretary.
Ka sorkar ka la shah ruh ïa ki Party ba kin wan ïalam shuh sa arngut kiwei pat ki dkhot jong ka Party nalor ki dkhot ba la jied. Nalor kata ka lah ruhban dang thung sa ïa kiwei ki dkhot ha kane ka Committee. Kane ka Committee kan ïatai lashai ka sngi bad kan sa phah ïa ka jingtyrwa sha ka sorkar.