Shillong, Jymmang 31 : Ka Shillong Lajong FC kaba dei ka lahduh ka la kiew sha ka kyrdan kaba nyngkong na ka Group C jong ka lympung ïalehkai Meghalaya State League 2023 hadien ba ka la pynliem ïa ka Mawten da 5-1 ha ka jingïalehkai ha madan MDSA Ground ha Mawkyrwat ha ka sngi Balang.
Ha kawei ka jingïalehkai, na ka Group B ka Sein Pynbhalang bad ka Youth Club Pdengkarong, ha kaba ka outh Club Pdengkarong ka la khur jingjop da kaba pynliem da 4-1 ha ka jingïalehkai ha madan Kiang Nangbah Stadium ha Jowai.
Kane kadei ka sien ïalehkai kaba lai na ka bynta ka Shillong Lajong FC ha ka MSL 2023, da kaba khur pura ïa ki 9 point, ha kaba ka la knieh ïa ka kyrdan ba nyngkong na ka Seven United ha ka jingïaknieh rung sha ka semifinals na ka Group C, ka Seven United haduh mynta ka kamai da 8 point na ki sawsien ïakhun.
U Babysunday Marngar u la ïoh ban thep ïa ka shi kol ha ka jingïalehkai ba dang ïaid ar minit hynrei ka Mawten ka la ïoh ban pynphai kylla ha ka minit ba 21 lyngba u Oversharp Ïawphniaw, kaba dei ruh ka jingshah pynphai kol kaba nyngkong eh ïa ka Shillong Lajong ha kane ka samoi ïalehkai kaba mynta u snem. Ka jingïalehkai ka la nang ïaid shakhmat, ka Shillong Lajong ka la ïoh biang ban lamkhmat bad lyngba u Hamedamanbha Wahlang uba la ïoh ban thep ïa ka kol kaba lamkhmat biang ha ka minit ba 23 bad ka kol kaba ar na ka bynta u Marngar uba la thep ha ka kol kaba 37, ka Shillong Lajong ka la ïoh ban lamkhmat da 3-1 ha kaba kut jong ka kylla step.
U Hardy Cliff Nongbri (76, 90+2 min) u la ïoh ban thep ar kol ha ka jingïalehkai jong ka kylla miet ha kaba ka Shillong Lajong FC ka la bteng ban ïoh khur jingjop biang.
Ha Jowai, watla ka jingïalehkai kam dei ka jingïaknieh kyrdan ba nyngkong, baroh arliang ka Pdengkarong bad ka Sein Pynbhalang ki la ïakhun tyngeh hapdeng madan bad pynshohbiej ïa ki paidbah lyngba ki rukom ïalehkai jong ki.
U Wanbor Langshiang u ïoh thep ar kol, da kaba thep ha ka jingïalehkai ba dang ïaid saw minit bad ha ka 40 minit na ka bynta ka Pdengkarong bad u paralok jong u, u Kindness Mukhim u la ïoh ban thep kumjuh ar kol ha ka minit ïalehkai ba 17 bad 77. U Paiabanteiskhem Bhoi u ïoh ban thep ïa ka shi kol ha ka minit ba 33 na ka bynta ka Sein Pynbhalang.
U Mukhim u la ïoh ban khurwit bun tylli ki jingpyrshang thep kol kaba la pynlong ïa u rangap kol u Rishanki Syngkon, ban ïoh kyrda bunsien. Ha ka minit ïalehkai ba 40, u Mukhim u la ïoh biang ban khyrwit ïa ka bol pynban ka la leit dei na u dieng kol, bad ka bol ka la wanphai biang bad poi ha ki kjat u Langshiang bad khlem da pynlehnoh ei u la ïoh ban thep shapoh kol.
