Syllad sa ka jingpang Masi LSD ha Ri-lum Khasi Jaiñtia, ïap 20 tylli ha Pynthorumkhrah

Shillong, Jymmang 30 : Hadien ka jingpang khlam ki sniang bala tip kum ka African Swine Fever, mynta pat sa ka jingpang ki Masi ba la tip kum ka Lumpy Skin Disease (LSD) bad kane ka la syllad ha kiba bun ki District ka Ri-lum Khasi.
Kat kum ka khubor ba ïoh lum, la ïathuh ba haduh 20 tylli ki masi kila iap kynsan kynsan na ka jingpang ka bym lah ban tip ha ka thaiñ Pynthorumkhrah, Shillong ha u bnai ba la dep bad la suba jur ba kine ki masi ki la iap na kane ka jingpang LSD.
Ka Sorkar Jylla lyngba ka Tnad Animal Husbandry & Veterinary, kala pynthikna ïa ka jingsyllad ka jingpang LSD ïa ki masi hapoh ka Ri-lum Khasi hadien ba la pynthikna na ka jingleh test jong ka National Institute of High Security Animal Disease (NIHSAD), Bhopal.
Kat kum ka jingpyntip ka Tnad, ka NIHSAD ka la phah ïa ka kaiphod jingtohkit ha ka 12 tarik Jymmang 2023 hadien ba test ïa ki nongmuna bala phah na ka Jylla naduh ka 28 tarik Iaiong, 2023.
Ka Tnad kala pyntip ba ki Shnong kiba la shah ktah ha kane ka jingpang Lumpy Skin Desease (LSD) ki kynthup ia ka shnong Sumer, Mawlyngkhung, Umpyrdong-Umden, Umkon-Umdem, Saiden-Nongpoh bad Jyntu-Nongpoh kiba hap hapoh ka Umsning C&RD Block ha Ri-Bhoi lem bad ka shnong Rangthong kaba hap hapoh ka Mawkyrwat C&RD Block, South West Khasi Hills.
Kum shibynta ban tehlakam ïa kane ka jingpang ban lait na ka jingsaphriang, ka Sorkar Jylla kala pynbna ïa kitei ki shnong kum ki ‘Infected Village’ ne ki Shnong ba la ïabit jingpang LSD.
Halor ka jingjia ha Pynthorumkhrah, haba la ïoh ban ïakren bad uwei u Nongri Masi uba la pyntip ba ula dep khot ïa ki doktor ka Veterinary halor ka jingïoh pang ki masi jong u bad ki doktor kila dep ruh ban ai injek nalor ki dawai ïa ki masi hynrei ki masi ki la iap na kane ka jingpang.