Kynnoh ka KJDSTA ba pynkheiñ ka sorkar ïa ka jingkular, rai ban pynjur ka jingïakhih

Shillong, Naiwieng 8: Da kaba kynnoh ba ka sorkar ka la pynkheiñ ïa ka jingkular ba la thoh halor ka dearness allowance, ki nonghikai skul deficit ha ka sngi Saitjaiñ ki la rai ban pynjur ïa ka jingïakhih jong ki halor ka provident fund, ka penshon bad ka DA.

Ïa kane ka rai la shim ha ka annual general meeting ba shisien shisnem jong ka seng ki nonghikai skul Khasi Jaintia Deficit School Teachers Association (KJDSTA), ha kaba la ïashim bynta da ki nonghikai bad ki nonghikai ba la shongthait bad ki nongtrei na ki LP, Primary, Upper Primary, Secondary bad Higher Secondary.

“Ngin nym ailad.Ngin ïai ïakhun na ka bynta ka hok jong ngi ba dang sahteng, na ka bynta ka hok jong ngi, na ka bynta ka hok jong ka pule puthi.Ngin ïai ïakhih”, la ong u president jong ka association u Bah Boswell Pala ha ki nongthoh khubor hadien ba la wai ka jingialang.

U Bah Pala u la ong ba ka sorkar, ha ka shithi ba 8 tarik u Risaw, 2026, ka la pynthikna ban pyllait ïa ka DA bad ki arrears shwa ka shuti Puja, hynrei kam shym la leh ïa kata.Ha ka por ba ka seng ka la ïakynduh ïa u Commissioner bad u Secretary ha ka 4 tarik u Naiwieng, ki heh ophisar ki la leh kum ki bym tip ïa ka rukom treikam, u la kynnoh.

U la pynpaw ruh ïa ka jingpynslem ban pyllait ïa ka jingpynkiew ïa ka RDA kaba 51 percent bad 53 percent, bad ka jingpynsangeh noh ïa ka Centralized Provident Fund ba la thaw ha u bnai Jymmang 2023.

Ha kaba ïadei bad kiwei pat ki mat kiba dang sahteng ki long ka jingbym pyntreikam ïa ka NPS na ka bynta ki nonghikai hadien u bnai Iaiong 2010, ka jingpynbor ïa ka Scheme 2026 kaba ka seng ka la kyntait, bad ka jingthaw ïa ka Board of Trustees kaba thymmai khlem ki dkhot jong ka association.

U Bah Pala u la maham pyrshah ïa ka jingleh jong ka sorkar ban pynrung ïa ka Single Provident Fund (SPF) lane ka jingai jingïarap (grand) lang sha ka deficit bad ka jingbym ai jingbit ban advertise ïa ki kam deficit post, da kaba ong ba kan pyntlot ïa ki kam bad kan ktah ïa ki samla pule bad ki nonghikai kiba kwah ban long nonghikai.

U la ong ba ka care committee kan sa pynbna shen ïa ka sien jam ban shim nangne sha khmat.