Rakhe ka BSG ïa ka lyngkhuh sngi ba seng ha Lok Bhavan da kaba ïaid paidbah bad aiti ki syrnot

Shillong, Naiwieng 08: Ka Meghalaya Bharat Scouts and Guides (BSG) ka la dep rakhe ïa ka sngi jong ka bad ka Rajya Puraskar Rally 2026 ha Lok Bhavan, Shillong, ha ka sngi saitjaiñ, ha ka jingïadonlang u Lat ka jylla Meghalaya, u C.H. Vijayashankar uba la pynbna ban ïarap pisa haduh T. 2 lak man u snem na ka ophis jong u na ka bynta ban kyrshan ïa ka rukom shakri ha kane ka jylla.
U Lat, uba dei u nongkyrshan jong ka Meghalaya Bharat Scouts and Guides, u la dep pynbna ïa kane ha ka jingïalang paidbah, kaba la sngewnguh hangne ïa ka jingnoh synniang ka seng halor ka jingpynroi ïa ki samla bad ka bynta ka jong ka ban kyntiew bad pynsan ïa ki nongshong shnong kiba kit khia, lyngba ki nongrim jong ka jinglong ryntih, ka jingïalam lynti, ka jingïeng ha la ki jong ki kjat, ka jingshakri bad ka jingïatylli ka ri.
U la pynkynmaw ba naduh ba la seng ïa ka, ka kynhun Bharat Scouts and Guides ka la pyni ïa ka bynta bakhraw ban pynshong nongrim ïa kine ki riti synshar hapdeng ki samla bad ban pynkhreh ïa ki ban ai ki synniang ba donkam ïa ka imlang sahlang.
U Vijayashankar u la ai jingïaroh ïa ka Meghalaya Bharat Scouts and Guides na ka bynta jong ka jingpyn long ïa ki prokram bapher bapher, jinghikai bad kiwei kiwei ki rukom jingshakri kiba la dep pynlong ha kylleng kylleng ka jylla.
U la kren shaphang ka National Level Tribal Meet kaba la dep pynlong ha kane ka nongbah Shillong ha u snem 2026 kum kawei na ki bynta ba kongsan kaba ai ka lad kabu ksiar na ka bynta ban ïakynduh bad ban ïa sngewthuh kham bha iwei ïa iwei pat hapdeng ki samla.
U la ai khublei ïa ka Guide Unit jong ka KJP Girls Higher Secondary School halor ka jingithuh ïa ka kum ka Historical Unit jong ka BSG ha ka por ba rakhe ïa ka jingdap 60 snem jong ka, kaba long ruh kawei na ki jingnoh synniang ba la slem jong ka sha ka Scouts and Guides ha ka jylla Meghalaya.
Haba ithuh ïa ki jingdonkam baroh ha ka liang ka pisa ban pynïaid ïa ka seng bad ban pynlong ïa ki kam jong ka, u Lat u la ong ba ki lad jingïarap kiba biang ki long kiba donkam tam na ka bynta ka jingtreikam kaba biang jong kino kino ki bynta jong ka pule puthi.
U la pynbna ba ka ophis u Lat kan sa ai ïa ka bai ïarap man u snem kaba T. 2 lak sha ka Meghalaya Bharat Scouts and Guides ban pynkhlaiñ ïa ki prokram bad ki kam jong ka.
Ka bynta jong ka jingrakhe, u Lat u la pyllait ïa ki sticker lama BSG bad u la sam ïa ki syrnod sha baroh 241 ngut ki nongïoh ïa ka khusnam Rajya Puraskar kaba donnam. Kine ki nongïoh khusnam ki kynthup ïa 77 ngut ki Scout, lai ngut ki Rover bad 161 ngut ki Guide.
Haba ai khublei ïa ki nongïoh khusnam, u Lat u la pynshlur ïa ki Scout bad Guides namar ban bat pyrkhing ïa ki jutang bad ki nongrim jong ka kynhun bad ban bteng ban pynneh ïa ki thong jong ka. U la pynpaw ka jingkyrmen ba kin nangsan ban kylla long ki nongshong shnong ba kitkhia bad ban synniang sha ka jingtei ïa ka Meghalaya bad ka India kaba shongsuk, kaba tylli bad kaba nang roi.