Pan kaiphod ka ïing bishar HC halor ka jingpynheh ïa ka Kad Liengsuiñ Shillong ha Umroi

Shillong, Naitung 20 : Ka ïing Bishar High Court jongka jylla ka la bthah ïa ka Sorkar Jylla ba kan aiti ïa ka kaiphod kaba batai shai ïa ka jingïaid ka kam ha kaba ïadei bad ka jingpynheh ïa ka Kad Liengsuiñ Shillong ha Umroi wat haba ka DGCA ka la ong ba ka kloi ban ai ïa ka jingbit ban pyntrei noh ïa ka kam shisien ba ki jingai jingmynjur jong ka Sorkar ki la biang lut.
Ka Division Bench ka Chief Justice Revati Mohite Dere bad Justice W Diengdoh ka la pynmih ïa kane ka jingbthah haba bishar ïa ka mukotduma PIL ha ka Lah Sngi U Blei.
U Joint Director ka DGCA, B Bhushan uba mihkhmat lyngba ka video conference, ula pyntip ïa ka ïing Bishar ba ka DGCA kan pynïaid shakhmat ïa ka kam da ka jingai jingbit ban pyntrei tang mar syn ïoh ïa ka jingkular kaba pura na ka Jylla ban weng lut ïa baroh ki jingeh ha ka Kad Liengsuiñ ban her bad hiar ka Liengsuiñ.
Kine ki bynta ki long kiba kongsan na ka bynta ka jingshngaiñ ki liengsuiñ bad ki dei ki jingeh ba hakhmat eh ha ka jingpynheh ïa ka kad.
U Advocate General A Kumar, ba mihkhmat ïa ka Jylla, ula pan por ban ai ïa ka kaiphod (affidavit) ba batai kumno yn pyntrei ïa ka jingpynheh ïa ka Lynti her liengsuiñ hapoh ka kad.
Ka ïing Bishar ka la ailad bad bthah ïa ka sorkar Jylla ban ai ïa ka jubab hapoh ka Registry hashuwa ka sien shong bishar ban wan bad ban phah copy ruh sha baroh ki liang mamla.
Ka ïing Bishar ka la bthah ruh ïa u AG ban ai jubab ïa ki mat kiba la pynpaw ha ka paragraph 3 jong ka affidavit ba la ai da u Amicus Curiar P Yobin.
Kala bthah ruh ïa ki Ophisar na ka DGCA bad ka Sorkar Jylla ba kin ïadonlang, la ka long da ka met lane lyngba ka Video Conference, ha ka sien shong bishar ban wan.ïa kane ka mukutduma la buh ban bishar biang ha ka 23 tarik Naitung 2026.