Bamsmai u James PK Sangma kum u MP Rajya Sabha ba thymmai na Meghalaya

Shillong, Naitung 20 : U Myntri barim ka sorkar jylla, u James PK Sangma ha ka sngi Nyngkong u la shim smai kum u MP ba thymmai ka Jylla ha Rajya Sabha ryngkat bad ki 8 ngut ki wei pat ki MP na ki jylla bapher bapher jong ka Ri.
Ïa kane ka jingpynbam smai kaba u James u shim ha ka ktien Hindi la pyndep da u Chairman ka Rajya Sabha, u CP Radhakrishnan ha Parliament.
Ha kane ka sngi ïa u MP ba thymmai ka Jylla ha Rajya Sabha la synran lang ruh da u National President ka NPP bad Myntri Rangbah ka Meghalaya, u Conrad K. Sangma, uba dei ruh ha kajuh ka por u para jong u.
Na ka liang u Conrad haba thoh ha ka rynsan social media u la ong, “Nga la wan ban synran lang ïa u hynmen jongnga u James Sangma ha ka jingshim smai jong u kum u MP ba donburom ka Rajya Sabha na Meghalaya. Nga ai ka jingkitbok kitrwiang ïa u ha kane ka bynta kaba thymmai. To un long ka sur jong ki paidbah bad ban bteng ban shakri khambha shuh shuh ïa ka jylla bad ka ri.”
Ha kajuh ka por na ka liang ka National People’s Party ka la phah lang ka jingai khublei bad ka jingkitbok ïa u MP ba thymmai uba dei ruh ha kajuh ka por u National Working President ka party.
“Ka party ka ai khublei kitbok kitrwiang ïa u James Pangsang K. Sangma halor ka jingshim smai jong u kum u dkhot ba dang shu shah jied sha Rajya Sabha na Meghalaya,” la ong ka NPP.
Katba na ka liang u President ka National Peoples Youth Front ba dei ruh u Myntri ka sorkar jylla, u Bah Wailadmiki Shylla u la ong, “Nga ai ka jingkhublei ïa u James P. K. Sangma halor ka jingshah jied jong u kum u dkhot ka Ïingdorbar Thawaiñ ka Ri, ka Rajya Sabha khlem kano kano ka jingïakhun pyrshah. Kane ka jingjop jong u ka pynpaw ïa ka jingsngewskhem bad ïa ka jingshañiah ha u kum u nongïalam, ka jingïohi jngai bad ka jingkut jingmut jong u na ka bynta ki paidbah jong ka jylla Meghalaya.”
Shuh shuh u la ong ba ki don ka jingkyrmen skhem ba ka jingshemphang jong u ha ka kam shakri paidbah bad ka jingsynshar kin ïarap ban pynsngew ïa ka jingthrang jong ka jylla haduh ki kyrdan baheh jong ka ri. “Nga ai khublei kitbok kitrwiang ïa u, ha kaba un sa leit ban shimti ïa kane ka kam jong u bad nga khmih lynti ruh ba un nang ïaibteng ban trei shitom ha ka ban kyntiew ïa ki jingthmu jong ka Meghalaya bad pynkhlaiñ shuh shuh ïa ka sur jong ka hapoh ka Ïingdorbar Thawaiñ ka Ri, ka Parliament.
Kumban shu kdew hangne, u James Sangma uba dei u kyrtong monlang jong ka sorkar synrop Meghalaya Democratic Alliance (MDA) u la jop suk ïa ka shuki MP Rajya Sabha khlem da don mano mano ruh ba ïakhun.
Ki MP ba thymmai kiba pyndep lang ïa ka jingshim smai ha kane ka sngi ryngkat bad u James K Sangma ki kynthup ïa u Dr. Mukeshbhai J. Rathwa, Pawan Khera, Mahesh Kewat, Khiangte Laltluangkima, Dr. Satish Poonia, Prakash Chik Baraik, Sushmita Dev bad Sukhendu Sekhar Ray.
Napdeng kine, 5 ngut ki la shim smai ha ka ktien Hindi, 2 ngut ha ka ktien English bad 2 ngut ha ka ktien Bengali. Na kine, 3 ngut ki dei na West Bengal, bad marwei na Gujarat, Karnataka, Madhya Pradesh, Meghalaya, Mizoram bad Rajasthan.