Shillong, Lber, 7: Ki jaidbynriew Garo kiba la im bad kiba la shong la sah ha ki 54 tylli ki shnong kiba hap hapoh ka Raid Marwet jong ka Hima Mylliem ha ka sngi Palei ki la ki la pan jingïarap na ka Sorkar Jylla ba kan tuklar lem hadien ba kawei ka kynhun sengbhalang ka la pyrshah ïa ka jingai Sanad long Rangbah Shnong sha ki jaidbynriew Garo kiba sah hapoh kane ka Raid kaba hap ruh hapoh u pud u sam jong ka Khasi Hills Autnomous District Council.
U Adviser jong ka All Ribhoi Garo Headman Association (ARGHA) u Nickel R. Marak bad ka Serimina Marak ha ka jingïakren bad ki lad pathai khubor ki la ïathuh ba ki la pynsngew ha u Myntri Rangbah ka Jylla u Conrad K. Sangma halor kane ka jingpyrshah ban long Rangbah Shnong da ki Garo ha ki shnong ba la buhai shnong ki Garo ha Raid Marwet.
Ki la ïathuh ba u Myntri Rangbah ka Jylla u la phah ïa ki ban leit ïakynduh ïa u Chief Executive Member (CEM) jong ka Khasi Hills Autnomous District Council (KHADC) ban pan jingpynshai halor kane, la, ki Garo kiba dei ki trai shnong hapoh kane ka Jylla Meghalaya ki don hok neem ban ïoh ïa ka Sanad ban long Rangbah Shnong ha ki shnong jong ka Raid Marwet ba la sah tang da ki jaidbynriew Garo.
“Bun ki Garo kiba sah ha ki shnong hapoh ka Raid Marwet ngi la sah naduh ka por Phareng. Mynshwa ki don tang ki Garo ym don satia ki Khasi bad mynshwa la ïathuh ïa ki Rangbah Shnong Garo hynrei ka don kawei ka kynhun sengbhalang kaba pyrshah ban ai Sanad. Ngi dei ki trai shnong jong ka Jylla Meghalaya bad ngi la sah ha Raid Marwet naduh u snem 1905,” la ong u Nickel R. Marak.
“Mynshwa ki ailad ba ngin pyndonnkam ïa ki muhor Rangbah Shnong hynrei ka don kawei ka sengbhalang kaba pyrshah, katba kiwei kiwei ki sengbhalang kim pyrshah satia haba ngi la ïakren bad ki halor kane,” ong u Nickel.
U la ïathuh ba kane ka kynhun kan sa leit ban ïakynduh ïa u CEM ka KHADC ha ka taïew ban sa wan khnang ban ïoh jingpynshai halor kane ka mat,” u la ong
U la ïathuh ruh ba kum ka kynhun ki la pan jingïarap na u MLA bad na u MDC ba kin kren lem halor kane ka kam bad ka District Council.
