Shillong, Lber, 7: U Myntri Rangbah ka Jylla Conrad K Sangma, mynta ka sngi Balang, ula buh mawnongrim ban pynkylla, pynwandur thymmai bad shna ïa ki jingtei ban pynbhabriew ïa ka State Central Library, Shillong.
ïa une u mawnongrim la buh ha ka jingïalang kaba long ha U Soso Tham Auditorium ha ka jingïadon lang u Myntri ka Tnad Arts & Culture Bah Paul Lyngdoh.
Haba kren ha ka jingïalang, u Myntri Rangbah ula pyntip ba ka Sorkar ka don jingthmu ban tei da ki jingtei ba thymmai jong ka Soso Tham Auditorium ha kine ki snem bala lah hynrei kam shym la lah namar ka jingdon ka Covid. “Kam pher ngi lah ban pynkup ïa ka dur thymmai ïa ka auditorium bad ka complex kaba la shu ieh la slem khlem ka jingmaramot lane pynbha” ula ong.
Ula ong ba kane ka jingtei thymmai kan ai jaka ban buh ïa ki jingdonkam ka juk ba mynta bad kan pynkylla dur ïa ka Library kum ka jingtei kaba kynsai bha. Ula ong ruh ba ka Sorkar kan pynkup ïa ka dur thymmai ïa ka State Library Complex baroh kawei bad kan buh ruh ïa ka Cineplex lem bad ki rynsan ban leh drama bad kiwei kiwei.
U Myntri Rangbah ula kular ruh ïa ka song pisa na ka bynta kiwei ki project kiba hap hapoh ka State Library Complex.
“Kane ka dei ban long ka centre kaba ki samla ba don sap ki lah ban ïakynduh, ïasam ïa ki jingnang jingtip bad ban pyni ïa ka sap ba ki don sha ka pyrthei bad ban pynlong ruh ïa kane ka jaka kaba jia, kaba im bad ka hui hui ha kaba kiba bun jait ki prokram art & culture yn lah ban pyni bad ïasam mar kylliang” ula ong.
U Myntri Rangbah ula ong ruh ba hapoh ka CM Elevate, ka Sorkar kan buh haduh 30 tylli ki movie theatre ha kylleng ki jaka jong ka Jylla ban kyntiew ïa ka art & culture, ki phlim bad ka ktien ka thylliej jong ka Jylla nalor ban ai rynsan ïa ki nongshna phlim ka Jylla ba kin pyni ïa ki kam ba ki trei.
Haba pynpaw ba ka 6 tarik Lber 2024 ka dei ka sngi dap shisnem jong ka Sorkar MDA 2.0 bad hynriew snem ka Sorkar MDA, baroh kawei kata 1 bad 2 u Myntri Rangbah ula ong ba ka Sorkar kala buh ïa u mawnongrim ka jingkiew irat bad ka roi ka par bad wanrah ruh ïa ki prokram ban pyntyllun shakhmat ïa ka Jylla. Ula pynpaw ruh ba da ka jingshaniah lang jong u paidbah, ka Sorkar kan lah ban pynurlong ïa ki jingangnud jong ki paidbah ka Jylla.
`U Myntri ka Tnad Arts & Culture Bah Paul Lyngdoh ula ai khublei ïa u Myntri Rangbah halor ka jingai ïa ka thong bad ka mishon ban pyntyllun shakhmat ïa ki shaka ka roi ka par jong ka Jylla.
Ula ai khublei ruh ïa ka National Library Board halor ka jingbei pisa ba T. 2.33 klur ban pynitynnad bad pynheh ïa ka State Library Complex.
