Shillong, Lber, 7: Ka Khasi Students Union (KSU) East Jaiñtia Hills District Unit ha ka sngi Balang ka la pan jingshai na u Deputy commissioner jong ka East Jaiñtia Hills District u Abhilash Baranwal uba dei u Chairman jong ka District AYUSH Society halor ka jingbym pyllait ïa ki katto katne tylli ki posts kiba kynthup naduh ki post Ward Boy, Ward Girl, Sweepers, Cook, Chowkidar, Jamandar, Peon bad kiwei kiwei kiba la pynmih Aadvertisement da ka ophis DM&HO ha ka 15 tarik Rymphang 2024.
Ka seng ka la pan jingshai bad la buh jingkylli hato kum kine ki Post yn set noh ne yn sa khot pat da kawei ka Advertisement.
“Ka seng ka suba ba ka don ruh ka shithi na u Commissioner ka tnat ka Koit ka Khiah ka Sorkar Jylla ba la btah ïa ki Deputy commi–ssioner kiba long ruh ki Chairman jong ki District AYUSH Society ba kin leh ïa kaba donkam ban pynbeit halor ka jingthepkam bad ïa ka Notification ne Circular ym shym la pynmih paidbah ban ai jingpynshai halor katno tylli ki Posts lah bthah ban pyntip paidbah,” la ong ka seng.
Halor kane ka jingpan jingshai, u Deputy commissioner u la ong ba un hap ban ïa phylliew jingmut shwa bad u DMHO ka East Jaiñtia Hills District uba dei ruh u Member Secretary jong ka Society shwa ban shim ïa kan kano ka rai.
Ka seng kan buddien halor kane ka jingkhot thepkam khnang ba kan long kaba khuid khlem da don kano kano ka leh shilliang ha baroh ki Posts.
