Weng noh ka JAC ïa ka pakhang surok ba kular ka NHAI ban shna ïa ka surokbah NH-6 hapoh lai sngi

Khliehriat, Lber, 07: Hadien ka jingpan por jong ki bor district kaba lai-saw sngi ban sdang noh ia ka jing maramot ïa ka surok, na ka liang ka Joint Action Committee jong ki khatwei tylli ki shnong na elaka Narpuh East Jaiñtia Hills District, mynta ka sngi ki la pynsangeh noh ïa ka jingiakhi kaba pakhang ïa ka surok bah NH-6 ha Narpuh, kane ka jingpakhang surok ka la sdang naduh ka por 6 baje mynne mynstep tat haduh ka por 4.30 janmiet.
Hadien ka jingiakren sani bha hapdeng u ADC ka East Jaiñtia Hills District, u bah G.Warjri lem bad ki nongïalam ka JAC ryngkat lang bad ki paidbah ha Umkiang, ka JAC ka la ngeit bad pdiang ban weng noh ïa ka jingpakhang surok bad ka JAC ka buh ruh da ki kyndon ba lada ka jingmara-mot ïa ka surok kam urlong hapoh kine ki lai-saw sngi ka JAC lem bad ki paidbah kin khot pynlong biang ïa ka jingpakhang surok ha Narpuh, ha kane ka janmiet na ka liang u ADC u la wanrah bad pyni ruh ïa ka work order kaba pyni ba ïa ka surok yn maramot noh shen.
U bah Warjri u la ong ruh ba na ka liang u contractor u hap ban leh ïa ka kam ha ka por ba la buh lym kumta u lah ban duh noh wat ïa ka work order ruh, la ong ba na ka liang ki bor district ruh kin shim khia ban kyntu bad pynkyrkieh ïa u contractor ban sdang pyntrei noh kham kloi, u la kyrpad ruh ïa ki paidbah ba kin sngewthuh lem ba u contractor u donkam ban lum ban lang ïa ki tiar ki tar ban maramot ïa ka surok na kata ka daw kan shim por hi katto katne sngi.
Na ka liang u President ka JAC, u bah Lasting Pala, u la ong ba “ U ADC, u bah Warjri u la kular ba hapoh lai-saw sngi yn shna bad maramot noh ïa ka surok kaba naduh Ratacherra haduh Tongseng, ngi pdiang ïa kane ka jing pan por tangba lada kane ka jingkren u ADC kam urlong na ka liang ka JAC kan pynlong biang ïa ka jingpakhang surok kaba sawphew phra kynta” u la ong ruh ba balei ka JAC ka hap ban shim ïa kane ka synjam ka dei namar ba ym don satia kano kano ka jingmaramot ïa ka surok wat tang khyndiat ruh, ka surok ka la dap sa tang ka thliew ka syar, ka la buh jingma bad buh jingeh haduh katta katta ïa ki paidbah nongleit nongwan, u la iathuh ruh ba na ka liang ka JAC ka la dep ban iakynduh bad pynsngew ha u Symbud myntri rangbah, u bah Prestone Tyngsong halor ka jingsniew palat ka surok ha ka thaiñ, u la ong ba ïa kane ka surok la dep aiti sha ka Dhar Construction Compa-ny bad ka JAC ka la ap haduh ar phew sngi hynrei kam don kano kano ka jingsei soh na kata ka daw ka JAC kan sa shim ïa kane ka synjam bad mih shakhmat ban pynlong da kane ka jingiakhih
U Secretary jong ka JAC, u bah Loveyou Bareh, u lapynpaw ka jingsngew khia namar ka jingsniew palat ka surok bad ong ba na ka por sha ka por ka JAC ka la dep iakren halor kane ka jingsniew palat ka surok bad ka jing trei thulmur ha ba pyntrei, ki kali kiba iaid ruh ki kit palat pud ka bym iahap shuh bad ka surok.
U Secretary Shnong Umkiang, u bah Nicholas Lyngdoh, u la ong ba donkam ban pynkloi ïa ka jingpyntrei ia ka surok namar lada hap slap kan wanrah jingeh ban pyntrei ia ka surok , u kyrpad ba katba lah dei ban pyndep noh ïa ka jingpyntrei ha shwa ban slap.
Ha ki kynta jong ka jingiakhih pakhang surok, la lap ba ki paidbah jong ka shnong Tongseng, Kuliang, Pyrtakuna, Umkiang, Donaskur, Donaumbluh, Ratacherra bad ki shnong kiba don ha ka shatri jong ka JAC ki la ïa mih paidah kynthei bad shynrang bad shong hapdeng surok, ki la kang lynti bad khlem shah ïa ki kali ban iaid, na ka liang ki Waheh Shnong, ki longkmie, longkpa ki la pynpaw ka jingsngew bitar namar ka jingmynthi ka sorkar jylla ka bym sngewthuh ïa ka jingeh ki paidbah ha ka leit ka wan, ki la iathuh ruh ba wat ki khynnah skul ruh ki mad jingeh ha kaba bunsien ki ju duh ban leit skul ruh na ka daw ka jingjur palat ka jingdheng kali ha ka thaiñ, ka jingsniew ka surok ka buh jingeh ruh ïa ki ba pang ba shitom kiba leit ban wad dawai sha ki jaka sumar.
Na ka liang u bah Lasting Pala, u la ai khublei ïa ki paidbah nongshong shnong baroh jong ka thaiñ kiba la ïa snohkti lang ha kane ka jingiakhih mynta ka sngi bad u khmih lynti ruh ba ka jingmaramot ïa ka surok kan urlong noh shen kumba la dep kren da u ADC, lym kumta ka JAC kam mih madan biang.