Nongpoh, Lber 07: Hadien ba shipor ba ka Khasi Hills Autonomous District Council ka la sospon ïa u Bah Wanphrang Syiem Nongshai kum u Sirdar ka Elaka Nongpoh Sirdarship kaba dei na ka jingdon ka jingujor pyrshah ïa u halor ki kam synshar khadar, hynrei mynta u Bah Wanphrang Syiem u la wan phai biang kum u Sirdar ba pura ka Elaka Nongpoh Sirdarship, kaba dei hadien ka jingai rai hi da ka Khasi Hills Autonomous District Council.
Kum ban pynkynmaw, ka KHADC ka la sospon kam shipur ïa u Bah Wanphrang Syiem Nongshai bad ka la thung ïa u Bah Pillarstone Syiem Nongshai kum u Acting Sirdar ka Elaka Nongpoh Sirdarship, hynrei hadien ba la tohkit bad bishar halor kitei ki jingshah ujor ka KHADC mynta ka la ai rai biang ïa u Bah Wanphrang Syiem Nongshai ba un shimti biang kum u Sirdar ka Elaka Nongpoh Sirdarship kaba dei halor ka Nongrim ba ka jingshah ujor jong u kam shym la la don Nongrim ei ei.
Kane ka jingioh biang u Bah Wanphrang Syiem Nongshai kum u Sirdar ba pura ka Elaka Nongpoh Sirdarship ka dei ruh hadien ba na ka liang ka KHADC ka la pynmih syndon da ka jingpynbna lyngba ka Executive Committee ka KHADC ba la pynkut noh ïa ka jingtreikam u Pillarstone Syiem Nongshai kum u Acting Sirdar kaba dei katkum ka hukum Dt. 04.03.2024 kiba dei katkum ka kyndon aiñ jong ka United Khasi-Jaintia Hills Autonomous District (Appointment and Succession of Chiefs and Headman) Act 1959.
Lyngba katei ka kyndon la pynbna biang ïa u Bah Wanphrang Syiem Nongshai kum u Sirdar jong ka Elaka Nongpoh Sirdarship ba un bteng biang ïa ka kam katkum ka Sanad No.DC.XXVIU Genl/12/ 2012 24 bad ka KHADC ka la pynbna ruh ba kane ka hukum kan treikam noh mardor tad haduh ban da ai hukum da kumwei pat.
