Nongstoiñ, Lber 07: Ka seng WKSU ka la pynpaw ka jingsngewkhia halor ka jingnang kiew ki kam sniew, khamtam ka jingshah pynïap ha sor Nongstoiñ ha kine ki kyndiat sngi, ha kaba uwei u samla u (L) Macborn Bonnyson Kharbani u la shah pynïap ha ki riew thrang snam ki bym don shuh ïa ka ïatip lem para briew.
Ka seng ka pynrem jur ïano ïano ne kino kino kiba donkti ha ka ban shim noh ïa katei ka mynsiem ba kordor jong u tei u samla. Ka seng ka ai jingkyrshan ïa ka kur Kharbani na ka bynta ki sienjam kiba tyngeh ban ujor pyrshah ïa ki riew thrang snam riew bymman, kiba la pyndkut noh syndon ïa ka jingim jong utei u samla u ba dei na ka kur ka jait Kharbani.
Ka seng ka phah ka khubor sngewlem sha kiba haïing hasem ki kur ki jait ki kha ki man jong u (L) samla Macborn Bonnyson Kharbani u ba la khlad noh bad ai ka mynsiem kan shong jahthait ha ka ka jingsuk.
Ka seng ka dawa na ki bor jong ka aiñ khamtam ka police department, ba kan shimkhia ïa ki jingujor jong ka kur Kharbani halor kitei ki jingjia. Ai ba ki aiñ ki kanun kin ai ïa ka hok sha katei ka longïing kaba laduh ïa la u khun ba ki ieit ki thoiñ.
Ka seng ka dawa ruh dei ban pynshitom jur ïa kito kiba don kti ha katei ka kam pynïap briew bad ruh ym dei ban pyllait jamin da kaba suk ïa ki riew pyntriem ha ka imlang sahlang ha ka thaiñ West Khasi Hills khamtam hapoh sor Nongstoiñ.
Ka seng ha kaba ïadei bad ka jingpur stet ki kam sniew ki kam pynïap kiba har rukom ha ka sor Nongstoiñ, kan sa shong pyrkhat kumno kumno ban teh lakam ïa kine ki jingsniew.
Ka seng ka kyntu ïa ki bor Hima ki bor shnong ki bor sorkar ban kyndit thiah noh bad ban shimkhia, ha shuwa ba ki kam sniew kam bymman kin wan jia khala khala haman ki kyrpong ïing ki jong ngi jong phi, ong u samla D.Sun President West Khasi Students Union Seng kmie.
