Nongpoh,, Lber 07: Ka Synjuk ki Rangbah Shnong Ri Bhoi District (SRSRBD) ka la mih shakhmat ban ai ka jingkhublei kaba kyrpang ïa ka tnad Pulit Ri Bhoi, kaba dei halor ka jingshim khia ban ïa khun thma pyrshah ïa u drok kumba la paw ba ka tnad Pilice na Ri Bhoi na ka por sha ka ka por ka la ju ioh ban kem ïa ki snar ba don kti ha ki kam khaïi drok.
Kum ban pynkynmaw, ka tnad Pulit na Ri Bhoi dang shen ka la ioh ruh ban kurup haduh 4 hajar Kilo tam u Ganja ha Lad Umsaw ha Ri Bhoi kaba dei na ka jingshim khia ki bor pulit ka Ri Bhoi ban ïa khun pyrshah ïa kane ka jingkhaïi beaiñ ïa ki jingdih basniew.
Haba ïa kren bad ki Nongthoh Khubor, u President ka Synjuk ki Rangbah Shnoing Ri Bhoi District, u Bah B.B Makdoh, u la ong ba kum ka synjuk kaba ai ka jingshakri na ka bynta ka bha ka miat jong ki shnong ki thaw bad ki paidbah ha ka Ri Bhoi ka dap da ka mynsiem jong ka jingkmen, kaba dei halor ka Nongrim ba ki bor pulit ka Ri Bho ki la shim khia thikna ban ïa khun pyrshah na ka jingkynrei u drok.
U la ong ruh kum ka synjuk ka ai khublei kyrpang ïa u Superintendent of Police ka Ri Bhoi ryngkat ki ophisar bad baroh ki pulit kiba la ïa don bynta ha kaba ïa khun pyrshah ïa u drok bad kum ka synjuk ruh ka kloi ban ai ïa ka jingïatrei lang na ka bynta ban rad dyngkhong ïa u u drok bad kiwei kiwei ki jingdih ba sniew kiba pynsniewdur ïa ka imlang ka sahlang.
U la bynrap ruh da kaba ong ba ka Synjuk ka shim ïa ka bynta ban ai khublei kyrpang ïa ka tnad Pulit na Ri Bhoi ba kin dang shim shuh shuh ïa ka jingkitkhlieh ban ïa khun pyrshah ïa u drok bad kiwei ki jingsniew bad ha kawei ka bytna ka synjuk ka khot ka wer ruh ïa ki paidbah ban ai ka jingïatrei lang bad ka bor pulit bad bor District khnang ba da ka jingïatrei lang ngin lah ban rad dyngkhong ïa baroh ki jaid jingsniew kiba ktah bad pynsniew ïa ka imlang ka sahlang, u la bynrap shuh shuh.
