Nongstoiñ, Lber 07: Ka Hynñiewtrep Youths Council HYC Rambrai Circle hapoh ka jingïalam u Samla Bankitkupar Marweiñ ha ka sngi 7 tarik mynta u bnai, ka la leit ïakynduh ïa u SDO MePDCL Nongstoiñ, West Khasi Hills District, halor ka jingbym poi bill lait ha ki shnong jong ka thaiñ Rambrai.
Ki nongïalam ka seng ki la ong ba ki la ïoh ïa ka jingujor na ki paidbah nongshong shnong halor kane ka jinglong jingman bym poi bill lait la hynriew bnai. Kumta ka seng ka buh ka jingkyntu sha ka tnad ban leh ei ei halor kane ka jingeh ki paitbah.
Ka seng ka kynthoh ruh ba kane baroh ka lah ban dei na ka jingleh sting ki nongtrei lane dei na ka jingduna nongtrei ka office ba kam lah ban ai jingshakri kaba bha ïa ka thaiñ.
Kumta ka kyrpad ïa office ban shimkhia lem, khnang ba kan pynsuk ïa ki longïing bad kan nym ban khïa ïa ki paitbah ka thaiñ lada lah ban ai bill lait man la u bnai. Na ka liang u sahep SDO u la kular ban shimkhia ïa kane.
