Nongstoiñ, Lber 07: Ka FKJGP Mawliehbah Area Unit ka pynpaw ka jingsngewdiaw ïa ka jingbym lah ban pyndep jong ki contractor ïa ka surok Mawïaban-Mawkadiang sha Nongkaniang kaba la sanction da ka Sorkar Meghalaya lyngba ka, “Administrative Approval and sanction for Improvement Including Metalling and Blacktopping”, kaba 2 km (4th-5th km) (L=2.00km) kaba la mang pisa da ka sorkar Meghalaya ar klur tyngka.
Ha ka jingshisha la dep ai Tender sha ki 8 ngut ki contractor bad katkum ka final work order ki lah dei ban pyndep hapoh 12 bnai kata hapoh u bnai Kyllalyngkot 2024. Hynrei kaba sngewsih bad pynlyngngoh haduh mynta ka long ba nalor ba bun jaka la shu trei torti, ki dang don pat ki contractor ki bym lah ban pyndep ïa katei ka jingtrei kaba dang sah khongreng khlem don ba trei shuh.
Ka jingïoh ban shna ïa kane ka surok, ka la long shisha ka jingpynkmen ïa bun ki paidbah jong ki shnong kiba la pynïasoh da katei ka surok. Ka long ka jingkyrkhu haka leit ka wan ka kit ka bah bad khamtam ka pang ka shitom hynrei kumba ka long mynta ka pynduh jingkyrmen pynban.
Ka seng ka dawa ïa u Executive Engineer ka tnad PWD, ba un thaw ki lad ban tuklar bad bthah noh mardor ïa kitei ki contractor ki bym shym pat la pyndep haduh mynta, ban pyndep noh kloi katba lah khnang ba katei ka jingtrei kan dep noh ha ka por kaba biang shuwa ban wan ka aiom slap.
Lymda kumta ka Seng na ka bynta ka bha u paidbah kam banse ban hap shim da kiwei ki sienjam kiba tyngeh ban pynbor ban pyndep ïa katei ka surok.
