Jowai, Lber 07: U Chief Executive Member (CEM) ka Jaiñtia Hills Autonomous District Council (JHADC) mynta ka sngi sdang ïa ka Dorbar ula wanrah ïa ka Mang Tyngka kaba duna ïa ka jingpyllut da T.13.59 klur tyngka na ka bynta ka snem 2024-2025.
Kane ka mang tyngka ka kynthup ïa ka jingpyllut kaba T.218,22,60,300 (Arspah khadphra klur Arphew ar lak hynriewphew hajar lai spah) tyngka, katba ka jingmih pat ka long T. 204,63,23,500.00 (Arspah saw klur Hynriewphew lai lak ar phew lai hajar san spah) tyngka bad ka paw ba ka jingpyllut ka heh ban ïa ka jingïoh kaba kot haduh T.13.59,36,800 (Khadlai klur Sanphew khyndai lak Laiphew hynriew hajar phra spah) tyngka
La wanrah ïa kane ka mang tyngka da u CEM katkum ka Rule 109 jong ka Assam and Meghalaya Autonomous District Council (Constitution of District Council) Rules, 1951 jong ka District Council.
La pynsngew ruh katkum ka Financial Year 2022-23 la ïoh jingkheiñ ba ka jingïoh lum na baroh ki mar ka long T. 113,62,46,064/-, katba ka jingpynlut T.117,81,88,185/-. Katba ka Financial Year 2023-2024 lyngba ka Executive Committee kala ïoh lum haduh T.46,63,70,500/-, na ki marpoh khyndew Major Mineral bad T.13,96,86,519/- na ki minor Mineral, na ki khajna (Taxes) na ki kali mator ka long T. 14,50,93,319/-. Ka bhah ba la ïoh na ka sorkar jylla lem bad ki revenue la siew sha ki nongtrei ka Council, ka ram (Lone) jong ka Civil Work Department nalor kiwei de ki jingpynlut pynsep jong ka ophis.
Ka jingïoh na ka Financial Assistant jong ka sorkar katkum ka Financial Year 2023-24 ka long 17,00,000/- la ïoh na ka Land Reform Scheme katba naka Centrally Sponsored Scheme ka Council ka ïoh lum T.3,54,04,700 tang ka 1st Installment naka Digital India Land Record Modernisation Programme (DILRMP).
Ka jingpynmih jong ka Council nalade (Resources) ka long T.29,38,23,800/- bad na ka share revenue jong ka sorkar ka long T.97,50,00,000/-, ka jingïoh na ka Grants jong ka sorkar ka long T.77,74,99,700/-.
Ka Council ka la pyrshang ban pynmih revenue lyngba ka Executive Committee da kaba shim ïa kine ki sien jam kaba nyngkong ban pyntreikam ïa ka Jaiñtia Hills Autonomous District Council (Village and Town Development Council) Bill, 2023 bala pdiang haka 9 November, 2023 bad mynta la phah sha u lad ka jylla.
Kaba ar ban thaw ïa ka Village and Town Administration Department ba peit ïa ka jingpyntreikam ïa ka Building bye Law kaba ïarap ban pynmih jingïoh ïa ka Council lyngba ki Fee jong ki jingtei.
Kaba lai ka Art & Cultural Department kala pynbna kiba don ïaki jaka jngohkai Tourist Sports bad Stake Holder, ki Private Enterprise bad ki riew shimet kiba plie thymmai ïa ki Tourist Sport ki dei ban ïoh jingbit NOC na ka District Council. Nalor kiwei de ki lad pynmih Revenue ïa ka Council ka long katkum ka Notification No. JHADC/GENL/15/2023/1 dat. 25.09.2023.
Na ka bynta ka jingpynlut ban siew tulop ïaki nongtrei ka Council, ha kane ka Financial Year ban wan yn pynduna noh ïa ki nongtrei sha ka 1286 na ka 1335.
Khnang ban lait na ka jingduhnong jong ka Council la thaw ïa ka Internal Audit Section ha u snem 2023-2024 kane ka IAS ka la sdang treikam naduh u Septermber, 2023.
Ha kaba ïadei bad ka ka ophis thymmai jong ka Council “New Additional Office Building” la tei pyndep ïa ka ha u juh u snem kata haka 5 tarik December, 2023.
Ïa ki lad jingïarap Grant na ka sorkar kmie hapoh ka Financial Year 2023-2024 ka Council kala dep ban pyntrei haduh 363 ki Schemes/project na ka Tied bad Untied Grant kaba kynthup ïa ki tyllong umbam, ki Check Dams, Fishery Ponds, Ambulances, Water Canal, ki solar Light, ki ïing skul, Community Halls, ki jaka leit bar, ki madan, ki lynti ïaid kjat, ki jaka sait jaiñ nalor kiwei de kiba don hapoh ka WJHD.
Halor kine ki jingdonkam naduh ki jingïoh bad jingpynlut jong ka Council na ka liang u CEM ka JHADC ula khot ka jingïatrei lang jong baroh naduh ki Member, ki nongtrei ba kin ai ka jingkyrshan ïa kane ka Executive Committee ha kine ki san snem ba la dep, kiba la lah ban pynïaid ïa ki kam ka Council na ka bynta ka jingmyntoi jong ki paidbah ka Jaiñtia Hills hi baroh kawei. Ïa kane ka mang tyngka 2024-25 yn ïatai sani lashai ka sngi 8 tarik u Lber 2024 hapoh ka ïing darbar jong ka JHADC.
