Shillong, Lber 07 : U Bah Process T Sawkmie, MLA barim bad Co-Chairman ka Meghalaya State Development Reforms Commission, Meghalaya u la pynpaw ka jingsngewkmen kaba khraw halor ka jingwanrah burom I Dr Helen Giri ïa ka jylla Meghalaya hadien ba ka la ïoh pdiang ïa ka khusnam na ka President ka Ri India Droupadi Murmu mynta ka sngi.
“Nga sngewkmen shikatdei eh ba ka sorkar India ka la ithuh bad ai khusnam Sangeet Natak Akademi Award ïa I Dr Helen Giri, kaba long ka burom kaba khraw ïa ka ri bad ïa ka jaitbynriew,” ong u bah PT Sawkmie.
U la bynrap, “I dei iwei na ki longkmie iba trei shitom naduh ki por ba mynshuwa haduh mynta bad ka jingïoh jong i ïa kane ka khusnam kan ai mynsiem ïa ki khun samla kiba mynta.”
U bah Sawkmie u pynpaw ruh ïa ka jingkyrmen ba in nang lah ban ïai trei shitom bad ban nang lah ban sam ïa ki sap ki phong sha kiwei ki khun samla jong ka jylla.
Kumba shu kdew ka President ka Ri India Droupadi Murmu kala pynkup burom da ka Sangeet Natak Akademi Awards (Akademi Puraskar) 2022- 2023 sha ki 91 ngut ki nongak drama ba pawnam kynthup (2 tylli Joint Award) haka liang ka Performing Arts.
Ïa kane ka jingpynkupburom la pynlong hapoh ka Vigyan Bhawan, New Delhi ha kaba I Dr Helen Giri na Meghalaya i la ïoh ïa ka khusnam Sangeet Natak Akademi Award na ka bynta u snem 2023 halor ka jinglah jong ka ban kyntiew bad ban pynpaw nam ïaki rukom tem bad rukom put tynrai ka Meghalaya.
Ka Kong Helen Giri, kaba la kha ha ka 7 tarik Lber 1944, ka dei kaba la paw bha haka put ka tem tynrai napoh Meghalaya bad kala shim bynta ban kyntiew bad ban pynneh pynsah ïa ka shad tynrai.
Ka Kong Helen ka dei ruh kaba ju don bynta ban rwai jingrwai tynrai Khasi hapoh ka All India Radio bad ka don bynta ruh ban pyninam bad ban pynsaphriang ïa ka put ka tem tynrai ha ki rynsan National level.
Ka la shim bynta ruh ban pyni ïa ka sap ha ki State, National bad International Level ïa kaba ka la ïoh ka jingithuh bad jingïaroh na ki bun balang.
Ka Kong Helen Giri ka ju pynlong ruh ki jait Prokram bad Tamasa ban kyntiew ïa ka put ka tem bad ka shad tynrai jong ka Meghalaya.
