Shillong, Lber, 7: U Chairman ka Regional Committee ba khmih ïa ka thaiñ West Khasi Hills u Bah Paul Lyngdoh uba long ruh u Nongaiktien ka sorkar jylla u la ong ba ka jingïakren pynbeit pud hapdeng ka jylla Assam bad Meghalaya ha ka wat kaba ar la dang hap ban pynsangeh shuwa, da kaba ïathuh ba ki jingïakren ki la slem na ka daw ka jingduna ka jingai ktien ne jingjubab na ka liang ka Sorkar Assam.
Ïa kane u Bah Paul Lyngdoh u la ïathuh haba ïakren bad ki lad pathai khubor hadien ba la buh ïa u mawnongrim ïa ka Rabindranath Tagore Cultural Complex TCC ha Rilbong.
U Bah Paul uba dei khmih ïa ka Langpih ka thaiñ West Khasi Hills kaba dei kawei na ki jaka kaba dang ïaid ha ka lynti ban ïakren pynbeit pud u la ong ba ïa kane ka kam yn sah ban ïaid shakhmat tang ynda la ïoh ka jingai ktien na ka sorkar Assam.
Kiwei ki shnong kiba hab ha ka jingïapynbeit pud ki kynthup ïa ka Borduar, Nongwah-Mawtamur, Deshdoomreah, Block-II ha Ri Bhoi District; Block- I, Psiar – Khanduli ha West Jaiñtia Hills District.
Haba pyrshang ban kylli khambniah halor kane na ka liang u Bah Paul Lyngdoh u la pynpaw ïa ka jingeh ban ïathuh lut halor ka jingïaid jong kane ka jingïakren pynbeit pud naba u la ong ba kin sa don kiba shim kabu namar ka ilekshon ka la jan
Haba ong ba ki donkam satang 2 sngi ban leit jurip ïa ki jaka hynrei la hap ban slem noh na ka daw ka jingbym pat jubab jong ka sorkar Assam.
Haba ong ba ka donkam satang 2 sngi ban pynlong ïa ka jingleit jurip jaka hynrei ka la don ka jingpynslem namar ka jingduna ka jingai ktien ne jubab na ka sorkar Assam.
U Bah Lyngdoh u la pyntip ba ha kawei pat ka liang, ka la don ka jingpynpaw ba ka Assam ka la mon ban shimbynta ha ka jingleit jurip ha u bnai Lber mynta u snem.
“Ha kawei ka bynta kaba ngi dei ban peit bha ka long ba kum kine ki jait kam kum ka kam ïakajia pud kan lah ban poi sha ka jingïatakhuh khamtam ba ki ilekshon ki la jan naba kin sa don kiba ïaleh ban kren ïa kane ka kam ban khring ïa ki nongthep vote ,” ong u Bah Lyngdoh.
Halor kane u la pynpaw ruh ïa ka jingkyrmen ba ïa kane ka kam ynsa lah ban pyndep noh kham kloi.
