ïasoi MoU ka sorkar jylla bad ki shnong ban ïada ïa ki tyllong um ka wah Ganol bad Umïew

Tura, Nailur 22: U Myntri Rangbah ka Jylla Conrad K Sangma mynta ka sngi ula ong ba ka Catchment Area Portection act ka Jylla, bala pynlong ain la palat 35 snem mynta, ha ka sien ba nyngkong eh lah pyntreikam thik kumba ka long, da ka jingiasoi ïa ka MoU bad ki Shnong ba kin iada ïa ka catchment area ka wah Ganol bad Umiew.
Haba kren ha ka jingialang ha ka Integrated Partner’s Support and Engagement Programme ha Tura, u Myntri Rangbah ula pynpaw ba watla ka ain ïada ïa ki catchment area kala don da ki phew snem, ka donkam ia ka jingsngewthuh bad ka jingbit jong ki Shnong ki Thaw ba kan treikam, ka lynti ka bym shym la lah pynurlong naduh u snem 1990.
“Ka jingiasoi MoU mynta ka sngi ka dei ka jingjop ba kongsan ka ban sah khana, da ka jingwan shakhmat ki shnong ki thaw ba kin iatreilang bad ka Sorkar ban ïada ïa ki catchment area kiba kongsan” ula ong, haba shim ïa kane ka jingiasoi MoU kum ka kam kaba kongsan bha ha ka jingiakhun ka Meghalaya ïa ka jingkylla ka suin bneng, haba khmih ia ka record ka Jylla ba jan kot 50% na ka jingioh ïa u slap ba jur hapoh ka ri bad kaba la iasakhi ïa ki jingktah jong ka jingkylla ka mariang.
Ïa kane ka MoU la pynshong nongrim ha ka MegARISE programme, kaba bynshet ïa ka jingkitkhlieh ban pynneh pynsah ïa ki khlaw ki btap beit beit ha ka kti ki shnong.Ka dei ka externally aided project ba bei tyngka da ka kfw German Development Bank ha ka jingmang pynlut ba T.344.4 klur, kynthup ka jingiarap song pisa na shabar ba T.277.2 klur bad ka bhah ka Jylla ba T.67.2 klur.
Kala sdang treikam ha u Naiwieng 2022 bad la pyniaid haduh u Naiwieng 2029.Ka project ka kynthup ïa artylli ki catchment kiba kongsan bha, ka Umiew catchment kaba dei ka tyllong umbam umdih ka Shillong Water Supply scheme bad ka Ganol catchment kaba weng ïa ka jingkyrduh um ha Tura.
Ka jingheh jong ka jaka ban pyntrei ïa ka project ka long 52,198 hectare ha ki 77 tylli ki micro watershed bad 226 tylli ki shnong. Ka Ganol catchment marwei ka long haduh 39,714 hectare ha ki 64 tylli ki micro watershed bad 132 tylli ki shnong, kaba long haduh 76% jong ka jaka baroh lang ban pyntrei ïa ka project, kaba kdup ïa saw tylli ki Block-Rongram bad Selsella ha West Garo Hills, Rerapara ha South West Garo Hills bad Samanda ha East Garo Hills.
Ula pyniasnoh ïa ka project ban pynbiang ïa ka jingdonkam um ha Tura, haba pynpaw ba ka jingiada ïa ka Ganol catchment ka kyrshan ïa ka Greater Tura Water Supply Scheme ba T.398 klur.
U Myntri Rangbah ula batai ïa ka MegARISE bad FOCUS Plus kum ka jingweng ïa ki jingeh ki nongrep na ki ar bynta: Ka FOCUS Plus ka kyntiew ïa ka jingioh kamai kat kum ka aiom katba ka MegARISe ka iada ïa ka um, ka khyndew bad ki khlaw kaba ka ioh ka kot ka shong eh ha ka.
Ha kane ka jingialang, u Myntri Rangbah ula pynlait ruh ïa ka installment ba nyngkong jong ka FOCUS Plus 2026, da kaba phah mar T.2500 sha ki 1, 14, 000 ngut ki nongioh bynta ha baroh kawei ka Jylla, kaba kot baroh lang haduh T.28 klur.Kane ka kynthup ïa 1, 04, 000 ki nongioh bynta kiba la don lypa bad 10,000 kiba dang shu register thymmai.
U Myntri Rangbah ula aiti ruh ïa ka MegARISE Community Award bad pynlait ïa ka kali AGEY na ka bynta ki SHG hapoh ka MSRLS.