Shillong, Nailur 22 : U Myntri Sorkar bad MLA ka Jirang Bah Sosthenes Sohtun ha ka sngi Ba-ar, ula ther kylla ïa ka Assam ba kynnoh ïa ka Meghalaya halor ka jingshlei um bad ong ba ka jingbym biang ki nala jong ka project National Highway bad ka jinglang ki jaboh jabaiñ ha ki wahduid kala wanrah ïa ka jingshlei um ha ki thaiñ Jorabat.
U Bah Sosthenes ula ong ba ka jingshlei um ka wan jia wat haba slap malu mala bad kane baroh ka dei namar ka jingbym biang ha ka rukom plan ïa ki nala.
“Ka lah ban dei kaba rit ne kaba heh hynrei ngi shem ba da ka jingpyntrei ia ka National Highway, khamtam ki nala, ki lynti tuid um, ngin ym ïohi lano ba kan kut” ula ong.
“Da ka jingbret ïa ki jakhlia hangtei, da ka jingbym pynkhuid ïa ki wahduid, kala nang kynton ïa ka jingshlei um wat haba hap slap malu mala” ula bynrap haba pynpaw ba ki kam ka NHAI kim shym la ailad ïa ka um ba kan tuid bha lyngba ki nala.
Halor ka jingkynnoh ka Assam ba ka jingpynmadan ïa ki lum ha Meghalaya khamtam ha USTM ki dei kiba wanrah ïa ka jingshlei um ha Guwahati, u Bah Sosthenes ula ong “Ki mih bun ki jingkynnoh na ka Assam”.
“Teng teng haba shlei um ha sor Guwahati ki kynnoh ïa ka Meghalaya, haba shlei um palat ïa ka Sonapur ruh ki kynnoh ïa ka Meghalaya” ula ong.
U Bah Sosthenes u la pynpaw ba ka long kaba bakla ban kynnoh ïa ka Meghalaya haba ki kam tei jingtei ki jia ha baroh arliang pud.
