Ngin sa pynlong biang sa shisien ïa ka North Shillong kaba sngewsarong : Ransom Sutnga

Shillong, Naiwieng, 19: “Ngin sa pynlong biang sa shisien ïa ka North Shillong Constituency kaba dap da ka jingsngew sarong,” ong Kyrtong ka NPP na North Shilllong Constituency u Bah Ransom Sutnga.
“Nga ruh ruh ban pynlong ïa phi baroh kiba dap da ka jingsngew sarong sa shisien pat. Kata ka dei ka thong jong nga,” ong u Bah Ransom haba kren ha ka jingïalang pynskhem ïa ka Executive Committee jong ka 17-North Shillong Constituency ha ka sngi Saitjaiñ kaba la long ha Mawkhar.
“Ngin pynthikna ba yn don shuh ka surok kaba sniew, ka nala kaba sniew, ngin sa ïatreilang ban wanrah ïa ka jingkylla,” ong u Bah Ransom uba long ruh u President ka Executive Committee jong ka 17-North Shillong Constituency ha kane ka jingïalang ba la ïashim bynta lang da u Working President ka NPP Meghalaya State Unit u Dr. Donkupar War, u MDC ka Mawlai Constituency u Bah Teiborlang Pathaw, ka Dr. Jasmine Lyngdoh ka kyrtong jong ka NPP na Nongthymmai Constituency, u Bah Rocky Hek u kyrtong ka NPP na Pynthorumkhrah bad kiwei kiwei.
Ha kane ka sngi, la pynskhem ruh ïa ki nongkitkam jong ka Frontal Wing, ka Womens’Wing bad ïa ka Youth Wing.
“Nga kyrpad ruh ïa ki nongkitkam jong ka Womens’ Wing ba kin trei shitom namarba phi don ïa ka bynta kaba khraw ban wanrah ïa ka jingjop ha u snem 2023,” la kyrpad u Bah Ransom bad bynrap, “ki kynthei ki lah ban wanrah ïa ka jingkylla bad ki lah ruh ban wanrah ïa ka jingjop.”
“Ki samla jong ka party, phi don ka jingkitkhlieh kaba khraw ban wanrah ïa ka jingkylla. Ki samla ki dei ka lawei jong ka North Shillong Constituency,” u la ong.
U la ïathuh ba ha ki sngi ki ban sa wan, ka party kan sa pynkha ïa ki shnat treikam ha ka thaiñ Jail Road, Police Bazar, Thana Road, Oakland, Governor’’s House ha kaba ïa ki nongkitkam yn sa kynthup lang ha ka Executive Committee.
“Kane ka dei thong jong ngi ban jop. Ka jingnangnud jong nga ka long ban ïatreilang ryngkat khnang ba ngin dup lah ban wanrah ïa ki jingkylla,” la ong shuh shuh u Bah Ransom uba la shongthait kum u Executive Engineer jong ka tnat PWD (Building) ka Sorkar Jylla.
“Da ka jingai ïa ka kti kamon ka kti ka diang ngin sa ïoh ïa ka jingjop ha u snem 2023,” la kyrpad u Bah Ransom.
U Bah Teiborlang Pathaw haba kren ha kane ka jingïalang u la khot bad wer ia ki paidbah ka North Shillong Constituency ba kin pynjop donburom ia u Bah Ransom Sutnga khnang ba ka NPP kan dup ïoh ïa ka jingjop kaba bun paid ha u snem 2023.