Shillong, Naiwieng, 19: Ka KAM Meghalaya ha ka sngi Nyngkong ba la dep ka la pyllait paidbah ïa ka jingrwai ïalap elekshon ba la ai kyrteng da ka ‘Ka Kam Kan Ïalam’, da ka thong ban pynshai bad pynsngewthuh ïa ki paidbah ha shwa ba kin rai ban jied ïa ki nongmihkhmat ha ka jylla.
Ïa katei ka thup jingrwai la pyllait paidbah da ka meirad ba la 93 snem ka rta, Kong Pheril Kharsyntiew na Malki kaba dei ruh ka mei-ieid jong ka Kong Wanpynhun Kharsyntiew kyrtong jong ka KAM na East Shillong bad ruh i meirad ba la noh bha ka rta Kong Amy Rangad ba dei meisan jong ka kyrtong ka KAM, Kong Angela Rangad.
Katei ka thup jingrwai kadei ruh ban ai mynsiem na bynta ki lai ngut ki kyrtong ba hakhmat jong ka KAM kiba pynkhreh ban aireng ha kane ka elekshon MLA kaban sa long shen, kata ka Kong Angela Rangad kaban aireng na South Shillong, Kong Wanpynhun Kharsyntiew kaban ïakhun na East Shillong bad ruh u Pastor Kyrsoibor Pyrtuh na North Shillong, kiba mih ban aireng ha katei ka rynsan ïakhun elekshon ha ka nongrim ka hok, ka jingïalong mar ryngkat bad ïa burom kylliang.
Na ka liang u Bah Kampher Mark Swer u ba thoh ïa kane ka jingrwai u la ai ka jingkren lyngkot u ong ba ka dei shisha ba ka Kam kan ïalam bad ka don ka jingkyrmen ha ka jingïatrei lang ha ka lynti ka hok ka shi kyntien. Ka “Kam” ka dei ka kyntien kaba kit ïa ka juh ka jingmut ha ka ktien Khasi, Garo, Hindi, Bengali.
