Nga donkam ïa u tyrnem ba heh ban tied ïa ki jingeh ka Mawhati Constituency : Charles Marngar

0

Nongpoh, Kyllalyngkot 24: Haba kren haka jingïalang paidbah ban pdiang burom ïaka jingwan pynïasoh jong u Bah Denis Mukhim ryngkat ki nongkyrshan jong ka MCPF hynnin ka sngi sha ka Seng Congress haka jingïalang kaba la long haka shnong Umsohlait, u Bah Charles Marngar u la ong ba kum u MDC ba ki paidbah kila jied haka bor barit u la pyrshang ban trei ban rung sha ki shnong bad ban sngap ïaki jingeh jong ki paidbah ha kine ki snem bala leit noh, hynrei hapdeng shibun ki jingeh bad ki jingtynjuh u mad bad kynduh ka dei namar ba u ioh ban bat ïa u tyrnem ba rit haka bor MDC ba um lah ban pyndep ïaki kam kumba u thmu ban shakri na ka bynta ki paidbah ka Constituency.
“Kum u MDC haka bor ba rit ngala pyrshang ban trei ban rung sha ki shnong ban sngew ban sngap ïaka jingeh ki paidbah kumba kila pynkup bor, hynrei sniew bok 2020 bad 2021 ka wan noh ka khlam Covid-19, bad kat kaba skhim kaba ioh na District Council nga la pyrshang ban pynpoi sha ki paidbah, ha u snem 2021 ngam ioh skhim shuh bad nga hap ban shim da ka ram 5 lakh tyngka na Bank ban pynbiang ïaki jingdonkam jong ki paidbah khyndiat katba nga lah ryngkat ka tulop, bad nga dap ruh da ka jing sngewkmen namar nga don ka longkmie kaba ju kyrshan ha syndah jong nga (Kurim) kaba ju ai mynsiem bad ong ruh mynta ka Lockdown ngin ïa bam tang da ka tulop nonghikai jong nga, ka tulop jong phi ai sha ki paidbah, ïathuh myllung u Bah Charles.
Shuh shuh u la ong ruh ba kum u MDC u dap da ka jingsngewkhia kaba jur ban iohi ba ki paidbah ki mad jingeh haki thaiñ khappud bad u ju pyrshang ban ai mynsiem bad don ha syndah jong ki wat ban hap sah miet namar ka mynsiem ban shakri ka rhem hapoh ka mynsiem ban lur ïaki lyngkha ba sah shrah jong ka Mawhati.
U la ong ruh ba kum u MDC um lah ban pyndep ïaki kam kumba angnud namar ka bor kaba rit bad u tyrnem u ba rit ba u bat ha kti, ki skhim na District Council ki duna wat kiba la dep ban phah ruh bun ki bym pat ioh kaba long ka jingeh kaba khraw, hynrei kum uwei naki kyrtong u ba thmu ban ïakhun ïaka elekshon MLA na Mawhati naka seng Congress u Bah Charles u la pan ka jingkyrshan bad u tyrnem ba heh naki paidbah ban tied ïaki jingeh jong ki paidbah ka Mawhati namar u tyrnem ba heh u don ha kti ki paidbah.
Namarkata, u la ong ba kala dei ka por ba ki paidbah kin ai ha u ïa u tyrnem heh ban tied ïaki jingeh ka Mawhati ban pynkylla dur khamtam ka jingeh jong ki paidbah haka ka rep ka riang, ka pule ka puthi bad ki liang baroh, u la bynrap.

Leave A Reply

Your email address will not be published.