Nongpoh, K’Lyngkot 24: Kumba 50 ngut ki nongïalam bad kynthup ruh ki nongkyrshan na ka party UDP bad NPP mynta ka sngi ki la leit ban pynïasoh sha ka party TMC ban kyrshan ïa u Bah George B. Lyngdoh kum u kyrtong ka party TMC na Umroi ha kane ka election jied nongmihkhmat jong u snem 2023 ha ka jylla.
Ïa kitei ki nongïalam bad ki nongkyrshan ba kynthup lang na ka party UDP bad NPP la pdiang burom ïa ki da u Bah George B. Lyngdoh kum u State Vice president ka party TMC bad uba dei ruh u kyrtong ka party ban aireng na ka Umroi Constituency.
Haba wan ban pynïasoh sha ka party TMC da kitei ki nongïalam bad ki nongkyrshan ka UDP bad NPP la don ryngkat lang ruh da u Nongïalam ka TMC bad uba dei ruh u MP ka Rajya Sabha, u Derek O’Brien, uba ki paidbah ki la ioh lad ruh ban ïa kren bad ban pynpaw halor shibun ki jingdonkam jong ki paidbah hapoh ka Constituency.
Na ka liang u Bah George B. Lyngdoh kum u kyrtong ka TMC na Umroi bad u MP ka TMC na Rajya Sabha, u Derek O’Brien ha kane ka sngi ki la pynpaw ka jingkmen ba ki paidbah ka Umroi Constituency ki la wan shakhman ban ai ka jingkyrshan ïa kane ka party bad kum ki nongïalam ka Party ki la kular ruh ban wan rah kata ka jingkylla na ka bynta ki paidbah lada ki paidbah ki la kloi ban pynjop ïa kane ka party kaba don ka jingangnud an kyntiew ïa ka bha ka miat bad ka roi ka par jong ki paidbah hapoh kane ka jylla.
Na ka liang u Bah George B. Lyngdoh u la kular ruh sha ki nongïalam ban kren halor shibun ki mat ki jura kiba donkam na ka bynta ka Constituency lada kum ki paidbah ka Umroi ki kloi ban pynjop ïa kane ka party na Umroi Constituency, u la bynrap.
