Nongpoh, Kyllalyngkot 24: Watla ka jingshna ïa u surok Mawhati kala ïaid shaid shaid hadien baka sorkar kala dep mang tyngka lyngba ka World Bank kaba long ka jingkyrkhu kaba khraw ïaki paidbah katei ka thaiñ ban pynsuk ïaka leit ka wan, hynrei kumba long mynta ki paidbah ki mad jingeh ha katei ka thaiñ naka jing pum pum namar ka jingtih khyndew ba ka jingshna surok ka dang ïaid shaid shaid.
Kum ban shu pynpaw ba ka jingmang tyngka naka bynta ban shna ïa u surok Mawhati haka wat ba nyngkong ka long haduh 83.38 klur lyngba ka Meghalaya Integrated Transport Project (MITP) bala bei pisa da ka World Bank haka jingjngai kumba 40.13 km ban sdang shuwa naduh Umsning haduh Sonidan.
La sakhi ruh kiba bun naki paidbah kiba shong ba sah ha shilynter jong utei u surok ki hap ban bam da u pum pum, kaba lah ban ktah ïaka koit ka khiah jong ki ha kaba kim ioh lad shuh wat tang ban thad ïaki jaiñ ki nep, naka jingtdem bad rung shaduh ki kamra ïing.
La ioh ruh ban kren bad katto katne ki riew rangbah na katei ka thaiñ kiba la pynpaw ba ka jingwan jong u surok ka long ka jingkyrkhu ïaka thaiñ hynrei ka jingbam tdem jong ki paidbah khamtam ki khyllung khynnah ka buh ka jingma ïaka koit ka khiah.
Naka liang ki paidbah kila buh jingkyrpad ruh ba la kumno kumno katba ka jingshna surok ka dang ïaid shaid shaid, ki bor ba dei peit ki dei ban theh um ban lait naka jingtdem palat bad ka jingpum pum.
