Khliehriat kyllalyngkot 24: U District Election Officer, East Jaiñtia Hills District, u pynbna paidbah ba ka Election Commission of India(ECI) ka la pynkhreh ruh ïa ki lad ki lynti da ki Posatal Ballot na ka bynta kito kiba la suba ba ki don ïa u khñiang jingpang covid-19, namar ba kim lah ban leit thep vote lang bad ki paidbah ha ki polling satation na ka bynta kane ka Meghalaya Legislative Assembly Election ka ban wan.
Ïa kine kiba la suba ba ki don ïa u khñiang covid-19, kito kiba don ha ki jaka sumar ne kiba don ha ka jingshah set slung (quarantine) ne ha ki Institution ki lah ban pynpoi (submit) ïa ki application jong ki ha ki form 12D da kaba phah copy lang ruh ïa ki syrnot kiba na ka tnat ka koit ka khiah kiba pynshai halor ka jingdon jong ki ia ka jingpang covid-19.
La buh ruh ïa ki Boot Level Officer (BLO) ba kin shim bad lum ïa ki form 12D jong kito kiba pang covid-19.
