Ha ka 26 tarik yn pynhap pyrda ïa ka 1st RYC Bataw Knock Out Football Tournament

0

Jowai, K’Lyngkot 24: Ka Rumshnong Youth Club Bataw kawei na ki Club kaba la rim bha hapoh ka Shnong Bataw ba la seng naduh ka snem 1967 kala pynlong ïa ka ‘1st RYC Bataw Knock Out Football Tournament’ bad ïa kane ka lympung yn pynhap pyrda haka 26 tarik mynta u bnai kaba dei ruh ka sngi rakhe Republic Day.
Ki ar tylli ki kynhun kiba wan ban ïakhun phainal kin long hapdeng ka Seven States One United FC pyrchah ïa ka Eleven Star FC.
Kane ka lympung ïalehkai phutbol jong ka RYC Bataw ka long shi bynta ban kyntiew ïa ki khun samla ka thaiñ ha ka kam ïalehkai khnang ba kin lait na ki jingsniew ne ki jingdih pynbuaid kiba ha rukom bad yn pynmih pisa kumjuh ïa ka Club la ïathuh u Deihok Sumer President ka Club. Kum ka dak jong ka jingsdang jong kane ka lympung ka Club kala pynkhreh ïa ki khusnam sha ki nongjop da ka song pisa lem bad ki Trophy na ka bynta ka kynhun ba jop kan long Rs.50,000/- (Sanphew Hajar Tyngka) ka kynhun ba wan ba ar kan long Rs. 30,000/- lem bad ka Trophy.
Na ka liang ka Club kala pyntip ba ïa kane ka lynpung yn dang ïaibteng ïa ka manla ka snem khnang ba yn lah ban sei pyrthei ïa ki samla kiba don shisha ïa ka sap ka phong namar ka kam ïalehkai phutbol ka dei kawei na ki lap ban pynïoh kam pynïoh jam ïa ki khun samla ha kum kine ki por ba mynta. Ula ïathuh ba ka shnong Bataw ka dei kawei na ki shnong kaba long pdeng bha ïa ki shnong kiba don ha ki thaiñ khappud bad kumjuh ïa ka 3rd Division (South West Zone) jong ka East Jaiñtia Hills District Sports Association (EJHDSA) la pynlong ha kane hi ka madan Madan Lacheh Bataw.
Ha kaba ïadei bad kane ka jingïakhun phainal ha ka 26 tarik ka Club ka khot bad wer ïa ki paidbah riewieit phutbol ba kin wan sakhi lang ha katei ka sngi, ha kaba ki player jong ki team heh kum na ka 7Wasa bad na kiwei de kin wan ban ïakhun ha kane ka lympung phianal.

Leave A Reply

Your email address will not be published.