Jowai, K’Lyngkot 24: Ka Balang shnong jong ka shnong Pasyih jong ka Parish Mooksiang (Phramer) West Jaiñtia Hills District, kan rakhe ïa ka jingdap shispah snem ka jingwan ka Balang Katholik ha shnong Pasyih ha kane ka 29 tarik Kyllalyngkot 2023 bad ha kane ka juh ka sngi yn pynkhraw ïa kane ka jingrakhe jingdap shispah snem da kaba pynlong ïa ka Proseshon Iukharist jong ka Parish Mooksiang ha shnong Pasyih. Ka shnong Pasyih ka jngai tang kumba 10 Kilomiter eiei na ka Sor Jowai ha ka surok na Jowai –Pasyih –Mynsoo-Shilliang Myntang.
Ha ka 29/01/2023, ka jingkñia Mass Iukharist bakhuid kan long ha ka por 10 baje mynstep (10.00 AM) bad ka Proseshon kan sdang ha ka por shibaje eiei nohphai sngi. Ban pynkhraw ïa kane ka sngi na ka liang ki Phadar ka Parish Mooksiang, ka Parish Pastoral Council bad ki paidriewngeit ka Balang shnong Pasyih ki khot ki wer ïa ki Para-khristan jong ki Parish bapher bapher jong ka Jylla ñiam Jowai bad ïa ki paid Khristan na ki Parish bapher bapher jong ka Jylla Ñiambah Shillong bad Jylla ñiam Nongstoin ban ïawan ha ka ban pynkhraw ïa kane ka jingïarakhe dap shispah snem ka Balang ha shnong Pasyih bad ka Proseshon kaba shisien shisnem jong ka Parish Mooksiang.
