Pynkhreh u DEO-EJHD ïa ka Postal Ballot na ka bynta kiba thut dkhot met bad ba tymmen

Khliehriat kyllalyngkot 24: Ka ophis jong u District Election Officer East Jaiñtia Hills District ka pynbna paidbah ba katkum ka jingbthah ka Election Commission of India kaba la ong ba baroh kito ki nongthep vote kiba don jingduna ha ki dkhot met kiba don haduh kumba 40 percent sha neng ka jingduna jong ki ha ki dkhot met bad kito ki tymmen kiba la kynjoh ïa ka 80 snem kyrta sha neng ki bym lah ban leit sha ki jaka thep vote ban thep ïa ki vote jong ki ha ka 27 tarik u rymphang 2023, la ailad ïa ki ba kin thep ïa ki vote jong ki lyngba ki Posatal Ballot.
U District Election Officer u pynhsai shuh shuh ba ïa ki application na ka bynta ki postal ballot lah ban ïoh na ka form 12D kaba dei na ka bynta kito kiba don jingduna ha ki dkhot met bad kito ki tymmen ha kaba ki dei pat ban pynpoi ïa ki form sha ki Returning Officer ha shwa ka 5 tarik u rymphang 2023 bad ki dei ruh ban pynpoi ïa ka syrnot Disability Certificate kaba hapoh ka section 2 jong ka hok jong ki ka Right of Person with Disability Act 2016, la bthah ruh ba ki Boot Level Officer (BLO) ki dei ban pynpoi ïa ki form 12D sha kito kiba don jingduna ha ki dkhot met bad sha ki tymmen.