Hiar u DC bad SP sha ki lai tylli ki shnong ha khappud ban ïaid beit ka jingthep Vote MLA

Jowai, K’Lyngkot 23: Kum shibynta ban pynsngewthuh ïa ki Booth Level Officer (BLO) kiba trei hapoh ka jingpynbeit ka Election Commission of India, na ka bynta ban jied ïa ki nongmihkhmat MLA sha ka ïing dorbar thaw aiñ ka jylla ka ban long ha ka 27 tarik u Rymphang kaba dei ka sngi thep Vote .
Mynta ka sngi na ka liang u Deputy Commissioner ka West Jaiñtia Hills u bah B.S Sohliya bad u Superintendent of Police u Bikram D Marak lem bad ki ophisar ki la leit hair sha ki Polling Station kiba don ha ki lai tylli ki shnong khappud bad ka Assam kita ki long ka Lapangap, Khanduli, Saitsama.
Na ka liang jong u DC ula kyntu ïa ki paidbah naduh ki Waheh Chnong bad ki BLO ba kin long kiba husiar bad kiba la pynkhreh na ka bynta ki jingdonkam jong ki briew kiba duna ha ki dkhot met kumjuh ruh na ka bynta ki riew tymmen kiba la kot 80 snem shaneng khnang ba kin ïoh ban pyndep ïala ka hok ban jied ïa ki MLA.
Shuh shuh u DC ula kyntu ruh ban shna ïa ki Ramp ha ki Polling Station na ka bynta kitei kiba don jingduna ha ki dkhot met bad kiba 80 snem.
Ha ka juh ka por ula tohkit ruh halor ka jinglong jingman jong ki paiñkhana, umkor bad kumjuh ïa ka bording bad na ka liang jong u la pyntikna ba yn pynbiang noh mar mar ïa ki jingduna baroh hapoh kine ki kyndiat sngi hashwa ka Election jied MLA.
Ha kane ka sngi na ka liang jong u DC ula ai ruh ïa ka shithi sha ki Waheh Chnong ba kin bud ïa ki kyndon kiba la buh da ka Election Commission of India (ECI).