Shillong, K’lyngkot : Ka jingkoit jingkhiah ka long ka spah bah, hynrei ka jingkoit kam lah ban long ka lynti sha ka spah. Ka Ka jingbamsap ha ka tnat ka koit ka khiah kala long ka bynta ha ka jylla naduh ba la pun ïa ka. Hynrei, kala nang jur ha ka phew snem kaba ar jong kane ka spah snem, ka jingpyndonkam bakla ïa ka pisa, ka jingpyndonkam ïa ki dawai ba la kut por,, ki jingaikam shipor kiba shu thok ki long kiei kiei kiba jia man la ka por.
Ha ka por ka jingsynshar u Mukul Sangma ha u snem 2010-18 ki la don shibun ki kam bamsap ha ka tnad ka koit ka khiah kaba la pynkyndit ïa ka jylla. Ka kam bamsap dawai capsule jong ka sorkar barim kaba kynthup ïa ka jingthied ïa ki dawai capsule ba shongdor T.7 klur hapoh ka NRHM ban pynkoit ïa ki shynrang ba lyngki, ka la sah ha ka jingkynmaw ki paidbah. Kala don ruh ka jingbamsap ba ïadei bad ki thei armet. Ka jylla kala thied ki dawai kuli ba shongdor 15 lak tyngka kiba la kut por na ka bynta ka jingpang duna snam ki thei armet bad ki kiwei ki kynthei.Ka jingthied ka long ka bynta jong ka 1.44 klur tyngka ki jingthied dawai hapoh ka NRHM na ka bynta ki kynthei ba pang duna snam kaba kynthup ïa kito kiba armet ha u snem 2011 haduh 2012. Ngi lah ban sngewthuh na kane ba ka jingkoit jingkhiah bad ka jingkdew ka koit ka khiah ka jylla ha kata ka por ka don shatrai duh. Kam long kaba bakla ban ong ba ka por ba synshar u Mulul Sangma kum ka ‘Corruption Pandemic’ lane ka khlam bamsap, namar kiei kiba la kdew haneng ki dei ki kam ïap kam im bad ka sorkar jong u kam don jingsngew eiei halor ka jong ka imlang sahlang bad wat ïa ki pategn ka ban dang wan.
Hynrei mynta kine kiei kie baroh kila kylla. Katba nangïaid, ka jylla kala sakhi ïa ka jingïaid stet ha ka tnat ka koit ka khiah. Halor ka mat ban kynthiew ïa ka koit ka khiah ha ka jylla. Hapoh ka jingïalam u Conrad Sangma, ka sorkar ryngkat bad ka phang ‘Your Health – Our Priority’, ka la buh ïa ka jingkongsan ka koit ka khiah hakhmat eh. Da ka jingbei tyngka kaba palat 350 klur tyngka ha ka koit ka khiah, la pyllait paidbah ïa ka ‘MOTHER Program’ ban pynbha ïa ka rukom kha khun ha kaba la plie paidbah haduh 150 tylli ki kali kit nongpang bad 80 tylli ki transit home, ka jingkynthup ba kham bun hapoh ka MHIS, ka jingtei bad kyntiew kyrdan ïa palat 2000 tylli ki jaka sumar ha kylleng ka jylla. Nalor kane ka sorkar u Conrad Sangma ka la pynrung kam palat 300 ngut ki heh ka tnad ka koit ka khiah, la pyllait paidbah ïa ka jingphah dawai da ki drone sha ki jaka ba kyndong, bad ki teleconsultation clinic ha kylleng ka jylla.
Kane ka jingshim khia halor ka koit ka khiah sha ki paid nongshong shnong kala wanrah jingbha bad ka jingkiew ha ka liang ka koit ka khiah. Ka Meghalaya kala lah ban ai dawai tika ba pura sha palat 91 na ka 100 ki khynnah, kaba la bat ruh ïa ka kyrdan ba hakhlieh napdeng ki jylla. Ka jingïap ki longkmie ka la hiar da 9 na ka 100 bad jong ki khyllung da 21 na ka 100. Ka Meghalaya ka la wan hakhliehduh napdeng ki jylla ban ai kaiphot halor ka jinghiar ka jingpang duna snam hapdeng ki kynthei hapdeng ki rta kaba 15-49 snem, kata kakum ka National Family Health Survey (NFHS) kaba 5, ba la leh da ka Union Health Ministry ha u snem 2019-21.
Ka jylla kala ïoh pdiang ruh ïa ka khusnam ha ka ri na ka bynta ka jingjop jong ka ha ka liang ka koit ka khiah. Ka jylla ka la ïoh ïa ka khusnam “Best Practice in Advocacy, Communication and Social Mobilization in Tuberculosis control” ha ka National Workshop halor ka ACSM ban rat dyngkhong ïa ka jingpangTB ha India, bad ruh ban lah ban kynjoh ïa ka thong ban pyntreikam ïa ki 448 tylli ki Health and Wellness Centers (AB-HWCs) hapoh ka Ayushman Bharat Comprehensive Primary Health Coverage program.Health and Wellness Centers (AB-HWCs) under the Ayushman Bharat Comprehensive Primary Health Coverage program. Ka jylla kala ïoh pdiang ruh ïa ka khusnam Ayushman Utkrishtata Puraskaar (Ayushman Excellence Awards) 2022 ha ki ar bynta na ka bynta ka jingpyndonkam lut ïa ki doktor bad ki nos ha ka “Healthcare Professional Registry bad ka Ayushman Bharat Pradhan Mantri Jan Arogya Yojana (AB PM-JAY)” kaba hakhliehduh ha ka jingpyntreikam ïa ka skim (2021-2022).
Kine ki jingjop ki pynpaw ïa ka jingkylla dur jong ka jingïaid lynti ka koit ka khiah ha Meghalaya ha kine ki 5 snem ba la dep hapoh ka jingïalam u Conrad Sangma ka la long kaba mynsiem shibun. Ka jingai mynsiem jong u kala pynïoh ïa ka jingsumar kaba tad bad kaba lah ban ïoh ïa baroh ha Meghalaya bad mynta ka dang don ha ka lynti ban nang kyntiew shuh shuh halor kane ka bynta.
