Shillong, K’lyngkot : Ka Seng Ri War Development Organization (RWDO) ka la phah da ka jingujor sha u Deputy Commissioner ka East Khasi Hills District halor ka jingkit palat pud ki trok kit mawthup kiba khaïi shapoh Bangladesh.
Ka Seng ha u kyrwoh lyngba u Bah Donlang Nongbri General Secretary ka la ong ba kane ka ka jingïaid beaiñ jong ki trok kit palat pud lyngba ka jingkieng Umngot/ Dawki, kata kiba kit palat ïa ka 14 bad 20 ton ka buh ka jingma kaba khraw ïa kane ka jingkieng kaba la rim bha, kata kaba la tei naduh ka por British snem 1932 ba ka lah ban khyllem kano kano ka por.
Ka la ong ruh ba ka daw ba ka Seng ka sngewkhia jur ka long ruh nama dei tang kane kawei ka lynti ne ka surok kaba ki paidbah ka thaiñ ki don ka lad ban ïaid ban ïeng ban leit ban wan bad ban kamai kajih. Kumta na ka liang ka Seng kam banse ban pynsngew ïa kine ki jingeh sha ki bor ba halor ba kin leh ïa kaba bha tam katkum ka notification jong ka sorkar ba la pynmih naduh ka 28 tarik Jylliew 2019, kaba la pynjari da ki kyndon section 144 Crpc ba ki kali kiba ïaid lymba kane ka jingkieng kim dei ban kit tam ïa ka jingkhia kaba 9 ton bad kim dei ruh ban ïaid 3 ne 4 tylli ki kali kiba khia ha kajuh ka por.
Ka Seng kala phah ruh sa kawei ka jingujor sha ka NHIDCL halor ka jingsniew palat ki surok naduh Mylliem shaduh Dawki Tamabil bad ban pynbha noh khamkloi na ka bynta ka suk ka saiñ ha ka liang ka leit ka wan jong ki paidbah.
Kumjuh ruh na ka liang ka seng ka la bthah ban phah siang rong noh ïa ki jaka jaka kiba la long ban siang rong khamtam ha ki shnong briew khnang ban lait na ka jingpum pum kaba ktah ïa ka koit ka khiah jong ki paidbah ka thaiñ.
Halor kane ka bynta ka Seng ka la ong ba na ka liang u Executive Director ka NHIDCL u la kubur halor kine ki jingsniew palat ki surok bad u la ai ruh ka jingpynthikna ba naduh ka 20 tarik u Rymphang u ban wan yn sdang noh ïa ki kam bad yn pyndep noh katba lah ha u bnai Lber 2023.
Shuh shuh ka Seng ka la phah ruh ïa ka dorkhas sha kane ka tnat ba dei khmih khnang ba kan shna noh khamkloi ïa ka jingkieng Dawki kaba thymmai khnang ba kan ym ktah shuh ïa ka khaïi ka pateng jong ki trai ri trai muluk bad khnang ban pynsuk ha kaba ïadei bad ka leit ka wan jong ki paidbah.
