Naduh 2016 la buh jingdawa ka KSU, hapoh 31 Risaw bthah u DC ïaka NHAI ban phah ïa ka kaiphod

Nongpoh, Risaw 27: Ki mat dawa jong ka Khasi Student Union, North Khasi Hills District Unit naduh u snem 2016 ban pynbhabriew, pynitynnad bad pynsuk ïaka leit ka wan naka bynta ka jingshngaiñ ki paidbah kam pat urlong haduh mynta bad dang ha kine ki khyndiat taiew ka seng kala leit ban pynkynmaw biang ïa u Deputy Commissioner ka Ri-Bhoi District bad kumjuh ruh sha ka NHAI bad ka Ministry of Road Transport and Highways ka sorkar India ïa kitei ki mat jingdawa kiba kynthup ïaki Floodlights, ki Zebra Crossing, ki lynti bad ki jingkieng ïaid kjat, ban maramot ïa u surok bah bad ban pynbha ïaki nala bad jaka tuid um ban lait naka jingshlei um.
Halor katei ka jingpynkynmaw biang ka KSU ïa kitei ki mat dawa naka liang u Deputy Commissioner ka Ri-Bhoi u la bthah ïa ka NHAI PIU-Shillong ban jurip lang ïa ka sor Nongpoh mynta ka sngi ryngkat ki bor district ka Ri-Bhoi.
Dei halor katei ka jingbthah na u DC ka Ri-Bhoi naka liang ka NHAI bala mihkhmat da u Krishna Gutty Consultant, u Aksah R Marak Assistant Commissioner ka Ri-Bhoi, u Bah Ferdinald Kharkamni President ka KSU NKHD lem bad ki nongïalam shnong ka Nongpoh, Mawdiangum bad Iewmawlong mynta ka sngi kila pynlong ka jingjurip lang ïaka sor Nongpoh bad kiwei kiwei ki jaka ba marjan naka bynta kitei ki jingdonkam ban pynbit pynbiang bad pynitynnad ïaka sor Nongpoh naka bynta ka jingshngaiñ bad ka jingbit jingbiang jong ki paidbah.
Lyngba kane ka jingjurip naka liang u DC ka Ri-Bhoi u la bthah ruh ïaka NHAI ba ka dei ban phah ïaka kaiphod shuwa ka 31 tarik mynta u bnai Risaw.
Haba kren sha ki lad pathai khubor naka liang u Bah Ferdinald Kharkamni President ka KSU u la ong ba kane ka jingleit jurip ryngkat ka NHAI bad bor district mynta ka sngi kala ai jinghun ïaki nongïalam ka seng watla ka kam kam pat ïaid shakhmat hynrei khmih lynti kumba la kular da ka NHAI katei ka project kan urlong noh shen naka bynta ka jingbit jingbiang bad ka jingshngaiñ ki paidbah.
U la pynpaw ruh ba kane ka jingjurip mynta ka sngi ka dei namar kum ki nongïalam ka seng kila leit ban pynkynmaw dang ha kine ki khyndiat sngi ïa u DC ka Ri Bhoi halor kitei ki mat dawa bad sngewtynnad ba ha kane ka sngi ka jingjurip la shim bynta lang naduh ki nongïalam shnong ka Nongpoh, Mawdiangum bad Iewmawlong.
U la ong ruh ba ha kane ka jingkynduhlang mynta ka sngi la ioh ban peit ban khmih ïaka jaka ban shna ïaka Foot Overbridge ha Nongpoh kawei bad ha Pahamsyiem kawei nalor kiwei kiwei kum ha Byrnihat, Umling, Umsning bad Lad Umsaw namar kine ki jingkieng kila dei kiba donkam eh khamtam kan pynsuk bad ïarap ïaki khynnah skul, ki riew tymmen ban jam na shilliang sha shilliang u surok 4-lane u ba bun ki kali ba leit ba wan.
Haba ïadei bad ka jingpynitynnad ïaka sor Nongpoh, naka liang u President ka KSU u la ong kumba long mynta ki nala ki long kiba rit kaba wanrah ka jingshlei um naka por shaka por bad la ioh ruh ban ai jingmut ha katei ka sngi ban pynheh ïaki nala ryngkat ki lynti ïaid kjat bad ki jingker ba ki paidbah kim donkam shuh ban ïaid na Service Road, nalor ka jingdawa ban buh ïaki floodlight ha Downgate, Pahamsyiem bad Iewmawlong ryngkat ki Zebra Crossing bad ki rumble strips.
Shuh shuh ka seng kala pynpaw ruh bala donkam ban buh da ki speed limit, bad ki ingboard kiba shai khamtam ha sor Nongpoh namar ka dei ka jaka kaba bun briew bad khapngiah bad la sakhi ba bun naki kali ki ju pynher sted kaba buh jingma ïaki nongleit nongwan.
Halor kitei ki jingmat dawa bad ka jingjurip lang mynta ka sngi naka liang u Bah Ferdinald u la ong ba kum ka seng kan nym shongkli kti hynrei kan buddien ïa ka kaiphod bala phah da ka NHAI, namar kam myntoi ba ki paidbah kin siew khajna sha ki toll plaza lada ka NHAI kam lah ban pynbiang ïaki jingdonkam ki paidbah ha surok bah.