Shillong, Risaw 27 : U nongïalam jong ka National People’s Party (NPP) u ba dei ruh u Symbud Myntri Rangbah ka jylla, Bah Sniawbhalang Dhar u la pynpaw ïa ka jingsngewskhem ba ka party jong u ka long kaba la pynkhreh bha na ka bynta kane ka elekshon MDC ha Garo Hills Autonomous District Council (GHADC) kaban sa long shen.
“Ngi la pynkhreh bha. Ngi la trei miet bad sngi. Ngim shim sting ïa kiei kiei,” u la ong da kaba bynrap ba u Myntri Rangbah ka jylla u Conrad Sangma u pynlut por ha rilum Garo la kumno kumno shi sngi ne ar sngi ha ka shi taiew ban peit ïa ka jingpynkhreh jong ka party.
“Katkum ki khubor ba ngi ioh lum ka jingkyrmen jong ka NPP ha kane ka elekshon ka long kaba bha shibun, bad ngi don ka jingkyrmen ba ngin ioh ïa u soh u bha hadien ka elekhson,” la bynrap shuh shuh u Symbud Myntri Rangbah.
Haba ïa dei bad ka ishu jong ki nongtrei ka GHADC, u Bah Sniawbhalang u la ong ba ka NPP ka la wanrah da ka rukom treikam ban pynbeit ïa kane ka jingeh, ym dei na ka bynta ka jingpynbna elekshon hynrei na ka bynta ka jingmyntoi bad ka bha ka miat jong ki nongtrei. “Suki suki bad shen hi ïa kane ka jingeh yn sa lah ban pynbeit,” u la bynrap.
“Namarkata, ngi donkam ban trei na baroh ki liang ban pynthikna ba ka party kan leh bha ha ki elekshon ban wan,” u la ong.
