Ïatai ki riewshemphang ïa ka mat jingïaid lynti ka Meghalaya kum ka jylla ba dang samla

Shillong, Risaw 27 : Ka Centre for Historical Research, Synod College (CHRSC), Shillong, ka la pynlong ïa ka National Seminar kaba ar sngi halor ka phang “Shadows of 1975: The Emergency and Meghalaya’s Journey as a Young State” ha ka 23 bad 24 tarik u Risaw, 2025, kaba la ïoh jingkyrshan na ka Chief Minister Special Grant, Government of Meghalaya.
Ka jingïalang ka long kum ka jingïakynduh kaba kongsan jong ki stad saiñ pyrthei, ki nongthoh kot, ki myntri, ki nonghikai bad ki samla pule ban pyrkhat bniah halor ka snem 1975 – ka por jong ka Emergency ha ri India bad ka jingïadei jong ka bad ka jylla Meghalaya kaba dang shu long jylla thymmai ha katei ka por.
Ha ka sngi kaba sdang la wan ban plie da u Bah Sanbor Shullai, Myntri Sorkar Meghalaya, uba la long u Kongsan. Ïa ka jingïalang la khlieh da Dr. Kerlihok Lyngdoh Buam, u Nonghikai bad u Nongïalam ka Department of History, katba ka Dr. Gayreen Lyngdoh, Principal, ka la ai ka jingkren pdiang sngewbha bad ka Dr. David Arnold Kharchandy, Secretary ka CHRSC, ka la ai ïa ka jingpynshai halor ka phang jong ka Seminar.
Ha kane ka sngi la plie la don ka Photo Gallery halor ka Emergency jong u snem 1975.
La don lai tylli ki Roundtable Discussion bad ar tylli ki Session ba ïakren halor ka offline bad online mode, ha kaba ki riew shemphang na NEHU, IIM Shillong, St. Edmund’s College, St. Anthony’s College bad kiwei pat ki skulbah ki la shim bynta ban ai jingmut halor ka jingïakhun jong ka synshar paidbah, ka jinglong laitluid bad ka bor pyrkhat jong ki paidbah.
Ha kane ka sngi la pynlong ruh ïa ka jingïakob tyrko (Debate Competition) jong ki samla pule, ka Screening ïa ka Film halor ka Emergency da ka Ministry of Information and Broadcasting, bad ka Photo Gallery kaba la pynbit pynbiang da ka CHRSC.
Ha ka jingkren pynkut, u Dr. David Arnold Kharchandy u la ong ba kane ka seminar ka dei ka lad ban kynmaw bad pynpaw biang ïa ka jingsngewbha bad ka jingïaishah jong ki paidbah Meghalaya ban sumar ïa ka synshar paidbah bad ka riti synshar ka long rynïeng jong ka jylla.