Ba wan ïaid sahuh ki kali kit Coke, kdiah lut ki jingkieng hapoh ka thaiñ Ranikor–Phodkroh

Mawkyrwat, Risaw 27 : Ka Khasi Students’ Union (KSU) Ranikor Circle ka pynpaw ka jingsngewkhia kaba jur halor ka jingïaid jingïeng jong ki kali kit Coke kiba la nang pynmih shibun ki jingeh ha ka surok bah kaba ïaid na Ranikor–Phodkroh–Umpung–Balat haduh Mawsynram.Kumta, ka Seng ka ong ba ki paidbah ha kine ki jaka ki ju mad bad kynduh jingeh man ka por namar ka jingdon ki kali kit Coke bad kit marbam ruh kiba sahkut, bad ym tang kiba la pynlong ruh ka daw jong ka jingkdiah ki jingkieng, jingkylla kali, bad duh kali hapdeng surok. Kane ka la ktah jur ïa ka leit ka wan ki nongshong shnong bad ruh ïa ka jingtreikam manla ka sngi.
Nalorkata, ka KSU Ranikor Circle ka kyntu jur ïa ka Sorkar jylla bad ïa ki bor District ba kin shimkhia mardor halor kane ka jingeh jong u paidbah. Ka Seng ka dawa ruh ba dei ban pyntreikam tynrai ïa ka jingbthah ban ailad tang ïa ki kali ba kham rit — haduh 9 tons — ban ïaid lyngba kane ka surok, namar ka surok ka long kaba barit bad ym dei satia kaba lah ban pdiang ïa ki kali kit palat jingkhia (overload).Ka KSU Ranikor Circle ka ong ruh ba lada ka sorkar ka dang shu pynslem ban shim khia halor kane ka jingeh, ka KSU bad u paidbah kin ym banse ban mih surok na ka bynta ban dawa ïa ka hok jong ki. Kane ka long katkum ka kyrwoh khubor na u bah Firstborn Turnia uba dei u Organising Secretary jong ka KSU Ranikor Circle.