Mawkyrwat, Risaw, 27 : U MLA ka Mawkyrwat Constituency Bah Renikton Lyngdoh Tongkhar ha ka sngi Balang ula hiar jurip ïa ka jingpyntrei ïa ka jaka pynlang um bad kumjuh ruh ïa ka jaka tan um lyngba ka Jal Jeevan Mission (JJM) jong ka Greater Mawkyrwat Combine Water Supply Scheme (GMCWSS) kaba kot T. 60/- klur tam ka ban pynpoi um ha ki 8 tylli ki shnong.
Ha kane ka jingjurip, u Bah Renikton ula pynpaw ba ka jingpyntrei ka la long ba la jan dep pura ban ïoh pyndonkam hynrei kaba sah mynta sa tang ban pynbha lyngba ka jingai ïa ki rong ki rup bad katto katne ki jingdonkam.
U la pynpaw ruh ba ka daw kaba la pynlong ban leit jngoh jong u ïa ki jingpyntrei ïa ka jaka ring um bad jaka pynlang um ka long na ka bynta ban pyntikna ba ki jingtrei ki la biang pura ne em ban pynbiang um noh ha ki 8 tylli ki shnong namar kiba bun ki paidbah bad kumjuh ruh ki nongpyntrei ki la pynsngew ha u shibun ki jingeh kiba ki ïa kynduh.
“Ha kane ka jingleit jurip nga la lap ba ki jingpyntrei ki ladep lut bad kaba sah satang ban pynbha bad pyni-tynnad da ki ki rup rong bad tang katto katne ban pynbha ïa ki ar tylli ki jingtei bad nga don jingkyrmen ba ha kine ki bnai tlang ba tyrkhong um ki paidbah kin sa ïoh ban mat noh ïa kata ka um sorkar lyngba ka JJM”, ong u Bah Renik.
Haba kren na ka bynta ki contractor, u Bah Renik ula ban jur ïa ki ban pyndep noh kloi ïa ki jingtrei kiba pyntrei ïa ki pipe um kiba pynpoi ha ki shnong bad ha ki ïing briew ha kine shwa kine ki bnai tlang, khnang ba ki paidbah kin ïoh ka umbam umdih kaba pahuh pahai lyngba ka Jal Jeevan Mission.
U Bah Renikton u la pynpaw ruh ba u khmihlynti ba ha u bnai Nohprah, 2024 lane bnai Lber, 2025, yn sa lah ban pyndep ïa kine ki jingtrei hynrei haduh mynta ym pat lah satia ban pynurlong.
Ha kane ka sngi la ïadonlang u Executive Engineer ka PHE Mawkyrwat Division Bah K. Nongbsaw, u SDO ka PHE Mawkyrwat Division Bah I. Kharbudon bad kiwei kiwei.
